Huab cua pauv ntxeev thiab cov pas dej tauv ua kom yuav tsum siv kev ua liaj ua teb txheej tshiab nyob ntawm peb ceg kaum dej Naj Khoom.
Raws kev tshaj tawm ntawm lub Leej Haum Kuj hnub tim 10 lub 10 hli no, mas huab cua pauv ntxeev thiab cov dej tsuag nqig tab tom ua teeb meem rau tej liaj teb nyob peb ceg kaum dej Naj Khoom.
Jack O’Connor tus kws txawj ntse ntawm yam muaj txoj sia hauv hiav txwv hauv lub Leej Haum Kuj lub tsev kawm txheej siab hais tias : “Dej nyab, ntuj nag thiab huab cua mem tsis tau, ua rau kev npaj ua liaj ua teb nyuab zuj zus.” Ntau tiam neeg los lawm uas cov neeg liaj neeg teb vam txog dej nyab raws caij nyoog, uas cov dej tsuag thiab tej av noo ntws los. Pab kom Nyab Laj teb rais ua thawj tug xa tawm nplej thiab txhuv tau zoo tshaj. Txawm li cas kuj xij, dej hiav txwv nce siab tuaj, ntuj qhuav thiab cov pas dej tauv pem hauv dej, tau ua teeb meem rau tej yam li hais no. Kev soj ntsuam fab kev tshawb fawb xyoo 2021, uas UN News tshaj tawm. Kwv yees tias tej av noo mus txog tej hauv dej nqis lawm ntau kawg. Kwv yees 143 plhom tons tsuas tshuav li 32 plhom tons nyob hauv 20 xyoo tas los. Kev nqis no ua rau kev txuag yam ntuj tsim raws lub ncauj deg thiab dej hiav txwv nce siab tuaj qaug zog kawg. Kev piam sij ntawm dej qab ntsev tau rhuav tshem tej liaj thiab dej tsuag heev zuj zus. Tej kev txhawj xeeb no tau ua teeb meem rau cov neeg nyob hauv nroog thiab cov haiv neeg tsawg, cov neeg Khmer, cov neeg Hoa thiab cov neeg Cham heev kawg. Kev tshawb fawb tau hais txog kev txom nyem hauv kev ua lub neej nyob hais txog huab cua yog qhov tseem ceeb ntawm cov neeg Khmer. Tshwj xeeb tshaj yog nyob hauv lub xeev Tra Vinh. Kom tau hloov pauv, mas ib co neeg liaj neeg teb thiaj pib cog nplej xyaw kev yug Cws sib xyaws ua ke. Nplej yuav cog rau qhov muaj dej tsuag, hos Cws yuav yug rau thaum dej qab ntsev nce siab tuaj. Qee leej siv kev ua liaj ua teb rau quav chiv mus rau kev rau chiv tshuaj thiab tshuaj tua kab. Tsis tas li ntawd kuj hloov ntau yam thiab. Hauv kev tshawb fawb mas O’connor thiab nws cov phooj ywg pom tias : kev ua liaj yog txhawb nqa kom muaj kab qaus liv, kab laug sab thiab lwm hom tsiaj tom tsiaj ntau dua. Dhau no lawm, ntses thiab roob ris hauv tej nras liaj yog txhiam xws noj thiab yog lub caij nrhiav tau nyiaj. Txawm li cas kuj xij, kev daws kho liaj teb ntawm qee tus neeg tseem muaj qhov txwv. Vim cov dej ntws los sib tshuam ntawm lub ncauj dej, muab cov dej hauv tej liaj teb nqus tas. Nws yog pib los ntawm txhua tus neeg. Tab sis tiag tiag mas xav tau kev muab siab rau ua ke thiab kev sib koom tes kom dav.
O’Connor hais tias kev yuav hloov kom haum rau huab cua pauv ntxeev uas zoo tiag ntawd, phim yuav vam txog kev sib koom tes ntawm cov neeg liaj neeg teb. Cov teeb txoj cai thiab tsoom pej xeem. Tshwj xeeb tshaj yog cov uas vam txog yam muaj txoj sia hauv thaj tsam peb ceg kaum dej los yug siav. Nws hais ntxiv tias : “Kev txhim kho txhua yam nyob ib puag ncig, yuav tsum ua kom ncaj ncees thiab yuav vam txog kev muaj feem cuam ua ke tiag tiag ntawm cov neeg hauv zej zog.”
