Cov tub ceev xwm hais tias : cov neeg uas raug ntxias dag ntawd, lawv yuav raug phais nyob Is Ntias teb. Hnub tim 3 lub 1 hlis tsaib no, cov tub ceev xwm sawv nyob ze ntawm lub tuam tsev txiav txim hauv Phas Noos Pees.
Muaj ib tug kws kho mob Khas Phus Chas, nws qhib ib lub tsev muag tshuaj nyob hauv lub tuam ceeb. Nws raug liam txim tias nws ua luam muag raum, thiab nws ntxias dag 18 tus neeg li nyiaj 1 plhom US dos las.
Cov neeg raug ntxias yog cov mob raum, lawv hais tias : lawv raug dag tias yuav coj lawv mus phais thiab hloov raum nyob Is Ntias teb, thiab raug ntxias dag nyiaj kho yam ub kho yam no. Vim muaj neeg kom, ces cov tub ceev xwm thiaj mus ntes ua ntej yuav raug phais hloov raum.
Khmer Times uas ua phooj ywg nrog tseem hwv tshaj tias : Ngeth Samoun uas yog tus kws kho mob nyob hauv Metro RLV Polyclinic raug liam tias : nws ua luam muag raum txhaum kev cai. Thiab nws raug liam lub txim ntxias dag luag tej nyiaj raws txoj cai 377 thiab 378. Cov tub ceev xwm ntes nws thiab coj nws mus nce tsev txiav txim, yog nws ua txhaum tiag, mas nws yuav raug txim 7 xyoo mus txog 15 xyoos.
Cov tub ceev xwm hais tias : muaj 18 tus neeg mob raum uas lawv tau mus kho mob ntawm Metro RLV Polyclinic. Metro RLV Polyclinic twb raug kaw nyob hauv 2 lub lis piam tag los lawm. Txhua tus neeg mob raug them nyiaj rau Ngeth Samoun ib leeg 50,000 US dos las, kom tau ua nqi kev thiab nqi txhua yam coj lawv mus phais raum nyob Is Ntias teb. Tab sis lawv tsis tau mus Is Ntias teb thiab lawv kuj tsis tau txais kev hloov raum.
