Thaib cov nom sawv pej xeem cev tso cai kheev cov txiv neej los yog cov poj niam rov sib yuav

Lub lis piam dhau los no, Thaib cov nom sawv pej xeem cev tau sib tuav xam thiab pom zoo cia cov poj niam los yog cov txiv neej rov sib yuav tau yam raug cai. Ces yuav ua rau lub teb chaws nce ib theem ntawm kev sib yuav muaj vaj huam sib luag.

Txoj cai no, tseem yuav raug lim ntau txheej ua ntej yuav rais los ua ib txoj cai raug cai nyob hauv lub teb chaws. Yog tias txoj cai no dhau thiab raug tshaj tawm, mas Thaib teb yuav yog thawj lub teb chaws nyob As Xias toob fab naj uas tso cai rau cov poj niam los cov txiv neej rov sib yuav tau. 

Lub rooj pwm tsav cog lus tuav xam thiab daws kho hais txog “poj niam” “txiv neej” “niam txiv” txoj cai sib yuav kom ncaj ncees rau ob tog.

Kev hloov no kheev kom tsoom pej xeem Thaib txhua tus tsis hais poj niam los txiv neej rov sib yuav tau yam tsis muaj cai txwv, thiab muaj cai txais me nyuam tom tav los tu thiab txais lub cuab tam tau. 

Nyob hauv lub rooj tuav xam, muaj qee tus nom sawv pej xeem cev tuav tej tus chij liab ntsuab sawv los cav, vim lawv tsis pom zoo. Tab sis nyob hauv lub rooj pwm tsav 360 lub suab pom zoo thiab cov tsis pom zoo tsuas yog 10 lub suab xwb. Nqe lus tseem ceeb no yuav raug xa mus soj ntsuam thiab tuav xam kom ntxaws ua ntej yuav rov tawm suab zaum ob seb puas siv tau tiag.