Pas Kis Taas pov hoob pob rau lub tuam ceeb Khas Npus, lawv hais tias yog tiv cov Taliban
As Kas Nis Taas tiv cov Pas Kis Taas kev tso hoob pob, ua rau kev tsis sib haum xeeb tsis muaj tag haj yam phem tuaj. Pas Kis Taas cog lus tias yuav ua tiag tiag rau cov neeg tsim kev kub ntxhov cov yeej tub rog nyob As Kas Nis Taas teb. Suav yog tus nyob nruab nrab hauv kev tsis sib haum xeeb no, thov kom ob tog muaj kev sib hais haum. Tsis tas li ntawd, cov neeg As Kas Nis Taas 21 plhom leej yog cov pluag txom nyem, thiab lawv yog cov yuav txais lub nra ntawm kev tsis sib haum xeeb tsis paub tag. Tom qab Pas Kis Taas tua cov Taliban ib lub yeej tub rog uas nyob hauv As Kas Nis Taas teb, raws li cov Islamabad hais nyob hauv ntau hnub dhau los. As Kas Nis Taas uas muaj cov Taliban ua tus coj, tau tshaj txog kev sib tua sai kawg rau cov tub rog Pas Kis Taas nyob raws ciam teb. Ua rau cov tseem hwv Islamabad yuav tsum maj ceev ceev tiv tej kev phem ntawd. Kev tsis sib haum xeeb no yog tshwm sim los ntawm kev sib liam hauv ntau lub hlis tag los. Pas Kis Taas hais tias As Kas Nis Taas pub chaw nyob thiab txhawb nqa cov neeg tuav riam phom kom lawv tua tiv lawv tus ciam teb, nrog rau kev rov tua tus kheej kom neeg tuag nyob hauv tuam ceeb Islamabad. Tab sis cov Taliban tsis lees tej lus iab hiam no, thiab lawv hais tias cov Pas Kis Taas tua tsoom pej xeem yam tsis xaiv li.
