Kev sib kis tus kab mob npaws tsob ntshav nyob Npees Las Des teb, ua kev kub ntxhov loj kawg rau tsoom pej xeem

Shakila Nasrin tseem tu siab txog nws tus nus txoj kev tuag. Nws tus nus hnub nyoog 49 xyoos thiab muaj 2 tug me nyuam. Nws tuag los ntawm tus kab mob npaws tsob ntshav 2 xyoos dhau los. Shakila Nasrin xav tias nws hmoov zoo kawg, uas nws tus tub tsis tuag nyob hauv 2 xyoos dhau los uas tus kab mob npaws huam loj heev.

Zaum ntawd nyob Npees Las Des teb muaj neeg kis tus kab mob npaws yuav luag txog 150,000 leej thiab cov neeg tuag yog 730 leej. Nws tus tub hnub nyoog 22 xyoos, nws tus tub pw nyob hauv lub tsev kho mob Dhaka 5 hnub, ces nws thiaj zoo lawm. 

Lub tsev kho mob yog qhov chaws kho mob rau tsoom pej xeem nyob hauv lub tuam ceeb, thiab kho mob pub dawb rau tsoom pej xeem yog 40 feem pua. 

Nasrin hnub nyoog muaj 55 xyoos, nws kuj dim ntawm tus kab mob npaws tsob ntshav ib yam. Nws yog xib hwb qhia ntawv nyob hauv lub tsev kawm ntawv East Jurain Government nyob hauv tuam ceeb Dhaka. Nws hais tias xyoo no muaj 53 tus me nyuam kawm ntawv uas mob npaws tsob ntshav. Tas cov me nyuam kawm ntawv yog 350 leej. Muaj qee tus me nyuam kawm ntawv tsis tuaj tsev kawm ntawv txog tav no, ces tsis paub tias lawv nyob li cas. 730 tus neeg mob npaws tuag, mas 521 leeg yog cov mus kho mob nyob hauv tseem hwv lub tsev kho mob thiab yog cov neeg pluag txom nyem. Muab xam yog 75 feem pua ntawm tas cov neeg tuag nyob hauv tuam ceeb Dhaka. Dhaka yog lub nroog loj thiab muaj tsoom pej xeem nyob ze ntawm 20 plhom leej.