Hafeesa uas nws yog ib tug ntxhais Los Hees Yas hnub nyoog 14 xyoos, nws yuav ib tug txiv neej Mas Les Xias 49 xyoos. Nws yuav tsum nyiaj mob, vim nws mob los ntev lawm. Ua rau nws los qaub ncaug tas mus li thiab tes taw tsis muaj zog.
Hafeesa nws raug hloov npe, vim ob peb xyoos tas los nws raug neeg ntxias nws ntawm Myanmar teb los. Lawv cog lus rau Hafeesa niam thiab txiv tias : nws yuav tau hauj lwm zoo ua nyob Mas Les Xias teb. Tab sis Hafeesa raug quab yuam yuav ib tug txiv neej uas muaj hnub nyoog ntau heev, thiab lawv cog lus tias yuav xa nyiaj mus rau Hafeesa niam thiab txiv txhua lub hlis. Nco tau tias lawv tau ntsib Hafeesa thawj zaug yog lub 3 hlis tsaib no, thaum nws nkag mus ua hauj lwm nyob hauv zej zog. Hafeesa yog ib tug nyob hauv 10 tawm leej me nyuam ntxhais nyob Myanmar uas raug ntxias mus muag los yog cov ntxhais Los Hees Yas nyob hauv yeej thoj nam Npees Las Des teb, lawv raug nyiag mus muag nyob Mas Les Xias teb. Cov me nyuam ntxhais hluas nkauj ntawd raug quab yuam ua niam ntiav, los yog raug muag yuav tej tug txiv neej laus laus. Yog cov neeg sawv cev ntawm pab neeg ntxias muag neeg uas muaj zog nyob hauv lub teb chaws. Npees Las Des tib lub teb chaws xwb, twb muaj cov neeg Los Hees Yas ua neeg thoj nam yuav luag txog ib plhom leej lawm. Lawv nyob tau yam tsis muaj kev ncaj ncees hauv 33 lub yeej thoj nam uas muaj tib neeg nyob coob coob. Yog tom qab uas muaj kev kub ntxhov nyob Myanmar teb, ces lawv thiaj khiav tawm hauv lawv tej zej zog ua thoj nam mus rau Npees Las Des teb. Lawv tsis tuaj yeem yuav khiav tawm mus rau lwm qhov chaw tau ywj siab thiab lawv raug txwv tsis pub ua hauj lwm los yog ua zog.
