Hnub nub tim 23 hauv lub 11 hlis lub Koom Txoos hwm Leej Ntshiab Kos Loos Npas.
Kos Loos Npas yug los xyoo 540 nyob hauv lub pov txwv Ais Lis. Xyoo 563, Kos Loos Npas kawm Phau Ntawv Ntshiab thiab kawm cov txuj ua Leej Choj. Kos Loos Npas txais lub Cim Tiag Tes thiab Cog Lus ua Txiv Twj Cuab nyob Ais Lis teb.
Kos Loos Npas muaj 23 xyoos, nws nrog nws 12 tug phooj ywg tau tsim ib lub tsev Txiv Twj Cuab nyob hauv lub nroog Npaas Nkos, nyob Ais Lis qaum teb.
Kos Loos Npas yog ib tug tub hluas uas zoo nraug ntxiag, nws lub ntsej muag sawm txiaj. Muaj cov ntxhais coob leej dai ncuv rau Kos Loos Npas thiab vam nrog nws koom ua lub neej.
Muaj ib hnub, txawm muaj ib tug Phauj Twj Cuab hais rau Kos Loos Npas tias “Kos Loos Npas, yog koj xav dim ntawm kev plees kev yi, mas koj yuav tsum khiav mus pej kum teb.”
Tiam sis Kos Loos Npas tseem nyob Npaas Nkos qhia cov txuj hais txog Tswv Ntuj xyoo puav ntxiv. Ze ntawm xyoo 573, Kos Loos Npas nrog nws 12 tug phooj ywg Txiv Twj Cuab caij nkoj hla hiav txwv mus rau hauv As Mos teb. As Mos teb yog ib xeev ntuj nyob hauv Nkas Lias teb ziag no yog Fab Kis teb. As Mos teb tseem muaj lwm lub npe hu ua Nplaws Tas teb.
Kos Loos Npas lawv nyob tsis ntev nyob As Mos teb. Kos Loos Npas lawv ntoj kev 14 xyoo rau Nkas Lias qaum teb.
Xyoo 590. Kos Loos Npas mus nyob Npws Nkoos teb. Tus Vaj Npws Nkoos muab ib thaj av rau Kos Loos Npas, ces Kos Loos Npas tsim thawj lub tsev Txiv Twj Cuab nyob Nkas Lias teb, hauv lub nroog As Naws Nqes.
Kos Loos Npas ua hwj huam yees ntxwv kho tau tej tug neeg mob kom zoo hlo. Mas tam sim ntawd muaj coob leej uas nyob thaj tsam tsis deb tsis ze ntawm As Naws Nqes coj lawv cov neeg mob tuaj rau Kos Loos Npas kho kom zoo. Tsis ntev, ces lub tsev Txiv Twj Cuab nyob As Naws Nqes puv nkaus.
Kos Loos Npas thiaj li mus tsim lwm lub tsev Txiv Twj Cuab nyob hauv lub nroog Lws Xaws, yog xyoo 592 tej.
Kos Loos Npas yog ib tug uas nto koob meej. Tas sawv daws tuaj nug zaj tswv yim zoo ntawm Kos Loos Npas, tsis hais cov Vaj los cov Tswv Qhia. Kos Loos Npas qhuab qhia lawv nruj kawg, tiam sis lawv sawv daws kuj mloog nws lus.
Kos Loos Npas tseem tsim ib lub tsev rau cov poj niam txiav siab yuav ua Niam Twj Cuab.
Thawj tug poj niam txiav siab ua Niam Twj Cuab hu ua Fas Las. Fas Las yog ib tug ntxhais nom. Ces muaj ntau tus ntxhais nyiam nrog Fas Las ua Niam Twj Cuab.
Nyob nyob, txawm muaj ib tug Vaj Npws Nkoos hu ua Ces Lis. Tus Vaj no muaj ib lub siab phem. Nws tua neeg thiab nyiam zes luag poj luag sev heev.
Tus Vaj Ces Lis thov kom Kos Loos Npas ua lub Cim Ntxuav rau nws cov tub. Kos Loos Npas tsis kam, ces tus Vaj Ces Lis npau taws heev.
Kos Loos Npas xav tias yog li mas tej zaud ntshai tsam txog nws lub caij tuag lawm. Ces nws tso Lws Xaws tseg, nws hla tus niam dej Lees Nws mus tsim ib lub tsev Txiv Twj Cuab nyob Zes Mas Nias teb.
Tus Vaj Ces Lis tseem xa ib pab tub rog tuaj mus muab Kos Loos Npas tua nyob Zes Mas Nias teb. Tiam sis Kos Loos Npas nto moo loj, ces tus Vaj Ces Lis cia li hloov nws zaj tswv yim, nws hais kom cov tub rog mus ntes Kos Loos Npas thiab xa Kos Loos Npas rov mus nyob Ais Lis teb.
Thaum lawv ntes tau Kos Loos Npas thiab coj nws mus txog lub nroog Naas Tes, nyob ze lub hiav uas lawv yuav kom Kos Loos Npas caij nkoj rov mus Ais Lis teb, mas Kos Loos Npas dim ntawm cov tub rog tes. Ces Kos Loos Npas thiaj mus tsim ib lub tsev Txiv Twj Cuab nyob Is Tas Lias qaum teb, nyob ntawm thaj chaw hu ua Npos Npis Yos.
Hnub tim 23 lub 11 hlis xyoo 615, Kos Loos Npas tas sim neej, nws lub hnub nyoog muaj 75 xyoos.
Thaum Kos Loos Npas tseem muaj txoj sia nyob, Kos Loos Npas thiab nws cov phooj ywg tau tsim cov tsev Txiv Twj Cuab muaj txog 200 lub tej.
Tus txhais : Muas Lauj, zoo tswv zov yaj
