Pob Zeb yug xyoo 1007 hauv ib yim neeg txom nyem nyob lub zos Las Vees Nas (Ravenna). Nws muaj ib tus tij laug hu ua Das Mis As Nos, nws yog tus pab txhawb Pob Zeb txoj kev kawm. Yog li Pob Zeb thiaj hu kam nws tus kheej tias ‘Kuv yog tij laug Das Mis As Nos tus Pob Zeb.’
Xyoo 1035 Pob Zeb tau txiav siab ua Txiv Tab Seeb (monk) nyob hauv lub koom haum Npes Nes Dis Tis (Benedictine), nws tau txais txoj hauj lwm qhia Ntuj kev cai rau cov tab tom kawm ua Txiv Tab Seeb.
Xyoo 1047, Pob Zeb Das Mis As Nos tau mus koom tsoom Tswv Qhia lub rooj sab laj nyob Los Mas, nws pom zoo nrog Vaj Qhia Nqes Nkos Lis Rau txhim kho lub Koom Txoos kev tshaj Ntuj Lus thiab tsa txoj cai los tswj tsoom Leej Choj kom lub Koom Txoos rov ntshiab thiab huam vam tuaj. Pob Zeb Das Mis As Nos sau ib phau ntawv hu ua phau ntawv Kos Mos Las (Liber Gomorrhianus) piav txog cov Leej Choj tus cwj pwm tsis zoo uas lawv lub siab ib rau ntiaj teb lub cuab tam, nyiaj txiag, thiab fim cov neeg ua phem. Pob Zeb Das Mis As Nos tseem sau kaum tawm phau ntawv los pab nthuav kev ntseeg thiab.
Pob Zeb Das Mis As Nos tau nrog lub Koom Txoos tiv cov neeg iab hiam lub Koom Txoos thiab cov Txiv Tab Seeb cuav, ces xyoo 1057 Vaj Qhia Tes Fas Nos Cuaj tsa Pob Zeb Das Mis As Nos ua Tswv Qhia Liab saib xyuas lub nroog Os Tias (Ostia).
Tswv Qhia Liab Pob Zeb Das Mis As Nos tuag hnub tim 22 lub 2 hlis xyoo 1072.
Vim Leej Ntshiab Pob Zeb Das Mis As Nos muaj siab kub lug txog Tswv Ntuj kev nyiam, nws sau ntau tsab ntawv nthuav txog kev ntseeg thiab ntuas tsoom ntseeg kom paub txog Tswv Ntuj, ces xyoo 1828 Vaj Qhia Les Os Kaum Ob (Pope Leo XII) thiaj tsa Leej Ntshiab Pob Zeb Das Mis As Nos ua ‘Koom Txoos tus kws txuj.’
