Ib tug Txiv Plig Pas Kis Taas hais meej tias ; nws yuav sawv hauv kev ncaj ncees rau cov neeg raug tsim txom.
Ib tug Txiv Plig Pas Kis Taas hais meej tias ; nws yuav sawv hauv kev ncaj ncees rau cov neeg raug tsim txom.
Thaum coob leej pom tias Txiv Plig tsuas yog tus sawv nyob ntawm lub thaj txi Ntuj hauv ntej xwb, mas Txiv Plig Khalil Maqsood uas yog tus Txiv Plig ntawm lub Cheeb Koom Txoos Kav Tos Liv nyob Faisalabad hauv Pas Kis Taas teb sab hnub tuaj. Thiab nws yog tus Txiv Plig nyob hauv lub tsev teev Ntuj hwm Leej Ntshiab Mab Liab nyob Samundri, tau piav txog nws cov hauj lwm tshiab ntawm kev sawv nyob pem hauv ntej hauv kev ncaj ncees, kom tau pab kev txhaum cai nyob hauv lub zos 437 GB.
Txiv Plig Maqsood tsis yog nyob hauv tsev teev Ntuj xwb, nws tau nkag mus txog cov neeg txom nyem lub neej. Nws txuag pov hwm lawv hauv kev noj qab haus huv thiab pab lawv fab txoj cai.
Tsoom pej xeem hauv lub zos 437 GB yog neeg liaj neeg teb, lawv nyob hauv thaj tsam Samundri hauv lub nroog Faisalabad, xeev Panjab. Kev kub ntxhov pib tshwm sim hnub tim 4 lub 4 hlis xyoo 2025. Yog thaum tus ntxhais hluas nkauj Muskan Riaz, uas nws muaj 16 xyoo raug 4 tug txiv neej muab mos deev. Lawv thau yeeb yaj duab tas txhua yam uas lawv tau ua coj mus tso nyob hauv Social Media.
Hanook Masih uas yog Muskan Riaz txiv hlob, nws yog ib tug neeg dig muag muaj 48 xyoo. Nws tau coj cov xwm txheej ntawd mus kom rau tsev txiav txim, kom pab nrhiav kev ncaj ncees rau cov neeg uas kheev kheev saib tsis taus cov neeg pluag txom nyem. Thaum pom tias Hanook tsis tuaj yeem ua tau dab tsi hauv txoj cai, mas Txiv Plig Maqsood thiaj mus pab. Nws pab cev cov plaub ntug thiab ua kom ntseeg tau tias lub tsev txiav txim yuav nqis tes ua hauj lwm hauv lub 10 xyoo 2025. Muaj ob tug neeg raug txim raug tso tawm nkuaj, vim muab nyiaj mus yuam. Tom qab nkawd tawm nkuaj los, mas nkawd hem Muskan Riaz tsev neeg thiab thov kom rho daim ntawv kom plaub ntug tawm mus. Txiv Plig Maqsood kuj raug hem tib yam, thiab lawv hem kom Txiv Plig tso tseg kev pab cuam. Txawm li cas kuj xij, Txiv Plig hais meej tias nws yuav sawv nrog txoj kev ncaj ncees thiab tsis tso Muskan Riaz tsev neeg tseg.
Txiv Plig Maqsood hais tias : “Qhov kuv tuaj nyob ntawm no tsis yog kev pab txoj cai xwb, tab sis yog kev sawv ntseg hauv neeg lub meej mom uas Tswv Ntuj muab rau peb txhua tus.” Nws tau nrog Hanook thiab Muskan nkawd mus hauv lub tsev hais plaub, kom tau pab nkawd hauv cov tub ceev xwm kev ntxig nug. Nws kuj thov Ntuj pab kom nkawd nyab xeeb thiab. Nws rais ua tus neeg tseem ceeb hauv kev pab cov yim neeg tiv nrog zej zog tej kev phem thiab kev tso hem thawj. Nws tseem pab Muskan hauv kev tuav xam thiab saib xyuas txog lub qhov txhab nyob hauv Muskan lub siab, nrog rau tej kev nyuab siab ntawm cov xyam uas tso tawm nyob hauv Online.
Vim kev nyob ib sab ntawm cov neeg raug tsim txom, tab txawm yuav raug hem tsis kav Txiv Plig Maqsood ua kom pom tias ; kev nrhiav kev ncaj ncees yog ib feem tseem ceeb ntawm cov hauj lwm tshaj Ntuj Lus. Kev kub ntxhov pib tshwm sim loj nyob hauv hnub tim 12 lub 4 hlis 2026. Yog thaum cov neeg phem ntawd tau hlawv Hanook lub tsev. Txiv Plig Maqsood tau coj lawv khiav tawm rau qhov chaw nyab xeeb thiab nrhiav txhiam xws, khaub ncaws, chaw nyob chaw pw rau lawv. Tam sim no cov plaub ntug tseem nyob ntawm lub tsev txiav txim kev tuav xam. Thiab Txiv Plig tseem nrhiav kev ncaj ncees rau Muskan tsev neeg tas zog, hais txog kev ua phem thiab hlawv vaj hlawv tsev.
