Hoob pob tawg hauv Hnub Plaub Txais Tshauv, qhia txog qhov cheem tsum hauv kev tsim kev thaj yeeb raws Thaib thiab Mias Mas tus ciam teb.

Hoob pob tawg hauv Hnub Plaub Txais Tshauv, qhia txog qhov cheem tsum hauv kev tsim kev thaj yeeb raws Thaib thiab Mias Mas tus ciam teb.

Txiv Plig Pongsak Od-Od yog tus Txiv Plig nyob hauv lub nroog Mae Sod, lub xeev Tak uas nyob nrug deb tuam ceeb Bangkok xib fab pej li 500 kis los mev.

Nws hais tias : “Thaum sawv ntxov hnov cov suab hoob pob saum nruab ntug nyob Mias Mas teb nrov txog Thaib teb, ua rau tsoom pej xeem ceeb thiab ntshai kawg. Hnub ntawd cov neeg ntseeg tab tom pib ua lub Caij Plaub Caug.”

Lub nroog Mae Sod yog nyob ncaj lub nroog Myawaddy uas nyob Mias Mas sab hnub tuaj. Yog thaj tsam muaj kev sib ntaus rog hnyav txij thaum cov tub rog Mias Mas txeeb kav teb chaws lub 2 hlis xyoo 2021 los. Lub sij hawm hnov suab poob pob tawg hauv Hnub Plaub Txais Tshauv, uas yog thawj hnub hauv lub Caij Plaub Caug ntawm cov neeg ntseeg, mas Txiv Plig Phongsak xav tias : zoo li yog ib lub Cim txawv txawv. Nws hais tias : “Hauv lub Caij Plaub Caug, mas zoo li thov kom peb tig los yuav lub siab tshiab. Qhov xwm txheej hnub no qhia peb tias ; kev thaj yeeb tsis yog yam uas nyob nyob cia li tau los. Nws yog qhov peb yuav thov Ntuj thiab txuag cia.” Yog lub caij cov neeg ntseeg hauv lub Caij Plaub Caug tab tom ua cov kab ke yoo thiab teev Ntuj. Txiv Plig hais tias : “Cov xwm txheej ntawm ciam teb, ua rau cov neeg ntseeg nkag siab txog kev txi Ntuj zoo tuaj.” Cov kab ke yoo uas tseem ceeb tshaj nyob hauv zim txwv no, yog “yoo kev phem, kev sib ntxub thiab kev nyob twj ywm. Kev txhawb nqa uas tseem ceeb tshaj, yog kev txhawb nqa hauv kev ua kwv ua tij.”