Bishops oppose Thailand's proposed gambling law
Cov Tswv Qhia tawm tsam txoj cai twv txiaj uas Thaib pom zoo.
Cov Tswv Qhia thiab cov Txiv Plig nyob Thaib teb koom tes nrog pab nom sawv pej xeem cev tiv tseem hwv, thov kom cov tseem hwv Thaib rho txoj cai kheev twv txiaj yuam pov tawm mus. Cov tseem hwv Thaib hais tias ; kev tso cai yog kev nqus kev nqis peev thiab txhawb nqa kev ncig tsham teb chaws.
Lub rooj pwm tsav Thaib tau tso lus kheev kom daws kho txoj cai kev lag luam hauv lub 3 hlis uas tau sib tham thiab pom zoo hnub tim 9 lub 4 hlis no. Txawm li cas kuj xij, xov xwm tshaj tias tam sim no tseem hwv Thaib tau ncua lub sij hawm tuav xam txog txoj cai no mus lawm. Vim muaj kev xyav moo heev kawg los ntawm pab nom sawv pej xeem cev uas tiv tseem hwv thiab cov thawj coj kev ntseeg hauv lub teb chaws. Feem coob yog teev hawm Phus Thas thiab yog lub teb chaws txwv tsis pub twv txiaj yuam pov txij xyoo 1935 los. Cov Txiv Plig thiab cov Tswv Qhia Thaib tau tawm tsam txoj cai no, thiab lawv hais tias kev twv txiaj yuam pov raug cai, yuav ua kom lub teb chaws thaub qab hauv fab kab lis kev cai. Lub pwm tsav Tswv Qhia thiab Txiv Plig nyob Thaib teb (CBCT), tau tawm los hais hnub tim 3 lub 4 hlis no tias : qhov uas cov Tswv Qhia thiab cov Txiv Plig tawm tsam txoj cai no, vim lub Koom Txoos txoj hauj lwm yog ua xib hwb qhia kev ncaj ncees rau tib neeg. Tswv Qhia Vira Arpondrat uas yog tus Tswv Qhia kav lub Cheeb Koom Txoos Bangkok, thiab yog tus thawj tswj lub rooj sab laj hais tias : “Lub Koom Txoos Kav Tos Liv thawj txoj hauj lwm yog : ‘tshaj kev coj ncaj ncees thiab kev tswj hwm hauv zej zog thiab txhua txhia qhov chaw.”
Nws hais tias kev ua kom kev twv txiaj yuam pov raug cai, yuav ua teeb meem hauv zej zog ; xws li muaj neeg quav kev twv txiaj yuam pov, teeb meem nyiaj txiag thiab nuj nqis, kev tua neeg, kev luam nyiaj, kev muag neeg thiab kev ntxias dag. Tshwj xeeb tshaj yog cov me nyuam yaus thiab cov tub ntxhais hluas.
