Is Ntias teb : Hauv kev qhuab qhia thov kom cov xib hwb qhia kev ntseeg hloov kev ntxiv kev ntseeg los ua pov thawj ntiag tug.
Kev qhuab qhia no npaj txij 9.30 teev sawv ntxov mus txog 16.30 teev tsaus ntuj nyob hauv tsev teev Ntuj qhov chaw sab laj. Muaj Txiv Plig Analin tus thawj tswj pab kav xwm fab qhia kev ntseeg nyob Tamil Nadu ua tus thawj coj kev qhuab qhia. Lub tsev teev Ntuj Tos Mas Forane ua hauj lwm rau cov neeg ntseeg nyob Thoothoor thiab rau cov tsev teev Ntuj nyob sib ze 8 lub. Tab txawm tias cov neeg ntseeg no nyob Tamil Nadu hauv Is Ntias qab teb, tsis kav cov neeg ntseeg Kav Tos Liv uas siv xeem lus Tamil kuj zwm rau lub Cheeb Koom Txoos Trivandrum kev saib xyuas uas nyob npuas lub xeev Kerala. Kev qhuab qhia hais txog kev lees paub lees txais ntawm cov xib hwb qhia kev ntseeg rau cov me nyuam thiab pab kom lawv txawj txhim kho nyias tus kheej kom haum nrog Yes Xus. Txiv Plig Analin hais tias : “Kev qhia kev ntseeg ntawd, nws tshaj qhov theej tej sob kawm hauv kev ntseeg. Cov xib hwb raug hu kom ua tus choj txuas nrog Yes Xus thiab cov me nyuam yaus. Kom Tswv Ntuj cov lus ua qhov chaw yug hauv kev qhia thiab kev ua lub neej niaj hnub ntawm lawv.” Nws hais ntxiv tias : “Kev qhia kev ntseeg yog qhov paj tshab ntawm Tswv Ntuj thiab yog txoj hauj lwm uas Tswv Ntuj muab rau lawv.” Thiab nws txhib kom cov tuaj koom kev qhuab qhia nkag siab txog cov me nyuam yaus tej siab ntsws hauv kev hais lus, kev nqis tes ua thiab kev ua tus piv txwv zoo. Dhau no lawm cov kws qhia tseem txog qhov tseem ceeb hauv kev muab kev qhia kev ntseeg tso nyob hauv Ntawv Ntshiab, uas txhib kom cov xib hwb qhia kev ntseeg nquag nyeem Ntawv Ntshiab thiab teev Ntuj txhua hnub, kom rais ua ib feem hauv lawv lub neej. Lwm yam uas muaj kev tuav xam ua ke, yog kev saib xyuas txhua yam nyob ib puag ncig thiab kev khuv leej cov neeg pluag txom nyem. Thiab tseem qhia kom cov xib hwb txhob coj tus yam ntxwv uas tsis haum rau kev sib raug zoo ntawm cov me nyuam. Xws li kev tuaj lig tas mus li, kev siv tej lo lus tsis tsim nyog, kev muab cov me nyuam los sib piv thiab kev coj nruj dhau.
