ZAJ NYEEM HNUB TIM 9 LUB 9 HLI 2024
HNUB OB LUB LIS PIAM 23 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 6: 6-11)
Kwv tij Hmoob sawv daws, niaj lis piam Hnub Chiv mas peb cov neeg ntseeg sib yaum mus ua lub txoos txi Ntuj nyob tim tsev teev Ntuj, peb mus mloog Tswv Ntuj Lo Lus, peb mus cav txog Tswv Ntuj lub txiaj ntsim, peb mus txais Huab Tais Yes Xus lub cev, peb mus ua Tswv Ntuj tsaug. Peb hais tias qhov no yog cov neeg ntseeg txoj sia, peb thiaj yuav tsum mus teev Ntuj txhua Hnub Chiv.
Peb cov ntseeg sawv daws yeej ua zoo li hais tiag, tab sis tshuav ib yam peb tsis tshua nco ua; yam li peb tsis nco coj Tswv Ntuj Lo Lus los ua raws nyob hauv peb lub neej.
Peb teev Ntuj tas; peb cia li rov mus nrog tsev neeg nyob so ua si pem tsev, peb coj tsev neeg mus kav kiab kav khw, peb ncig nuam yaj ua si kom kaj siab, peb rov lawm tom teb mus ua peb cov hauj lwm txuas.
Peb tsis nco tias Txiv Plig ntuas peb kom mus ua lub neej ua neeg ntseeg li cas, peb tsis khaws Tswv Ntuj Lo Lus coj mus xav tias hnub no los yog lub Lis Piam no Huab Tais Tswv Ntuj txhib peb kom ua dab tsi?
Piv li lub Moo Zoo hauv Hnub Chiv nag hmo, Huab Tais Yes Xus kho tus neeg dig muag kov rov pom kev, mas peb puas xav tias Huab Tais Tswv Ntuj tab tom ntuas peb kom tawm mus qhib lwm tus lub qhov muag kom pom kev tuaj.
Hnub no, Huab Tais Yes Xus tseem kho tus neeg tuag tes nyob hauv Hnub Xas Npas Tos hauv lub tsev txoos thiab.
Huab Tais Tswv Ntuj puas yog xav ntuas peb tias tsis yog txoj kev teev Ntuj xwb thiaj tseem ceeb, tseem tshuav ib yam tseem ceeb thiab; yog pab cov neeg txom nyem dua peb!
Kwv tij, peb nyiam mus teev Ntuj tsis ntxuam ib zaug li, tab sis peb tsis muaj ib lub siab hlub cov neeg txom nyem mas peb puas ua tau xis Tswv Ntuj siab nyiam?
Peb muaj ib lub siab hlub thiab pab cov neeg txom nyem tsis tseg, tab sis peb tsis muab siab rau teev Ntuj mas puas yuav xis Tswv Ntuj siab?
Peb mus teev Ntuj; mloog Tswv Ntuj Lo Lus thiab cav txog Tswv Ntuj lub txiaj ntsim tas, peb yuav qee Hnub Chiv ntawd mus ua cov hauj lwm hlub thiab khuv leej lwm tus puas tau.
