ZAJ NYEEM HNUB TIM 8 LUB 5 HLIS 2024
HNUB PLAUB LUB LIS PIAM 6 CAIJ HLA
COV LUS NYOB HAUV ZAM NTAWV MOO ZOO (Z 16: 12-15)
Kwv tij Hmoob, hnub no Huab Tais Yes Xus hais tias Leej Ntuj Plig yuav yog tus tuaj qhia qhov tseeb rau cov neeg ntseeg sawv daws. Niaj hnub no peb cov neeg ntseeg txog Yes Xus hauv lub Koom Txoos ntseeg tias Leej Ntuj Plig Ntshiab yog lub teeb tsom rau lub Koom Txoos kom qhia Tswv Ntuj Lo Lus mus raws qhov tseeb, mas peb cov neeg ntseeg thiaj ua ib siab mloog Vaj Qhia cov lus. Peb ntseeg tias Leej Ntuj Plig tshoj cov neeg txheej thaud kom sau phau Ntawv Ntshiab mus raws li Huab Tais Tswv Ntuj hais, mas niaj hnub no peb thiaj mloog cov lus hauv Ntawv Ntshiab. Peb ntseeg tias thaum Leej Ntuj Plig tuaj nyob hauv peb, mas peb yuav pom txog qhov tseeb thiab hais mus raws qhov tseeb, ces peb thiaj thov Leej Ntuj Plig tuaj nyob hauv peb.
Li ntawd, mas lub Koom Txoos thiaj qhia cov neeg ntseeg kom txhob hnov qab hu txog Leej Ntuj Plig ua ntej yuav ua ib yam hauj lwm dab tsi. Lub Koom Txoos thiaj muaj zaj hu txog Leej Ntuj Plig cia rau peb siv los teev Ntuj.
Kwv tij Hmoob sawv daws, vam tias niaj hnub nej yuav thov Leej Ntuj Plig xws li thov Huab Tais Leej Txiv thiab Huab Tais Leej Tub. Lawv 3 leeg yog ib tug Tswv Ntuj.
