ZAJ NYEEM HNUB TIM 7 LUB 6 HLI 2024
HNUB HWM YES XUS LUB SIAB NTSHIAB
COV LUS NYOB HAUV ZAM NTAWV MOO ZOO (ZM 19: 31-37)
Kwv tij Hmoob sawv daws, xyoo 1956 Vaj Qhia Pis Yus Kaum Ob tshaj tias tom qab hnub hwm Leej Ntuj Plig nqes los li 19 hnub, los yog Hnub Rau tom qab hnub hwm Yes Xus lub Cev thiab cov Ntshav mas lub Koom Txoos yuav ua lub txoos hwm Huab Tais Yes Xus lub siab lub plawv, los peb hais tias Yes Xus lub siab ntshiab. Hnub no lub Koom Txoos thiaj cev lub Moo Zoo raws li tus Hauv Paus Xa Lus Zam sau nyob hauv nws phau ntawv rau lub txoos tau mloog, yog zaj piav txog thaum tus tub rog muab hmuv nkaug Huab Tais Yes Xus phab tav ces muaj cov dej thiab ntshav tawm los.
Cov dej thiab cov ntshav ntawd ua lub cim tias Huab Tais Yes Xus nyiam ntiaj teb neeg tas nrho, nws tsis yog muab txoj sia los ua nqe txhiv peb xwb, nws tseem muab nws cov ntshav thiab cov dej hauv nws lub cev los ntxuav los ntxhua peb tus ntsuj plig kom ntshiab tuaj thiab. Huab Tais Yes Xus xav qhia txog nws lub siab nyiam rau peb mas nws thiaj pub nws lub plawv tawm tuaj rau peb pom. Thaum peb ntsia Huab Tais Yes Xus lub siab lub plawv, peb thiaj ras tias Huab Tais Yes Xus nyiam peb tas siab tas ntsws tiag, ces nyob hauv lub txoos peb thiaj hais rau Tswv Ntuj tias “Leej Txiv Ntshiab, tsim nyog peb yuav ua koj tsaug. Vim thaum koj Leej Tub dai saum Ntoo Cuam, nws cev nws txoj sia los pab peb tsoom neeg. Thaum tus tub rog rab hmuv nkaug koj Leej Tub lub plawv, ib co ntshav nrog ib co dej tawm los. Lub Koom Txoos cov Cim Ntshiab kuj yog tawm ntawm nws lub siab lub plawv zoo tawm los. Yes Xus lub plawv thiaj rub tas zeej tsoom los cuag nws. Sawv daws txas los txais kev kaj siab ntawm nws lub plawv txhawv cov dej pub txoj sia. Cov neeg hwm Ntuj saib koj Leej Tub lub siab yog lawv chaw so. Cov neeg txhaum saib koj Leej Tub lub plawv yog lawv chaw vam khom. Vim li ntawd, Leej Txiv, peb nrog Cuaj Phiaj Tshiab thiab tas tsoom Leej Ntshiab cav txog koj lub koob meej mus li tias”, ces lub txoos thiaj hais zaj ‘Faj Tim Huab Tais Ntshiab’.
