ZAJ NYEEM HNUB TIM 7 LUB 5 HLIS 2024
HNUB PEB LUB LIS PIAM 6 CAIJ HLA
COV LUS NYOB HAUV ZAM NTAWV MOO ZOO (Z 16: 5-11)
Kwv tij Hmoob, thaum cov thwj tim raws Huab Tais Yes Xus qab, lawv ntsib ntau yam xwv txheej mas Huab Tais Yes Xus ua tus pab daws rau lawv, Huab Tais Yes Xus ua kom lawv sov siab. Tab sis txij hnub Huab Tais Yes Xus raug ntes thiab tua tuag saum Ntoo Cuam mas cov thwj tim ntshai thiab ntxhov siab tas nrho. Thaum lawv pom Huab Tais Yes Xus sawv rov los, mas lawv rov muaj kev vam khom thiab tso siab dua tuaj, lawv qhov ntxhov siab txia ua kev zoo siab; lawv lub siab rov nyob kaj lug.
Tab sis hnub Huab Tais Yes Xus hais rau lawv tias nws yuav rov mus cuag Leej Txiv nyob pem ntuj, lawv yuav tsis pom Huab Tais Yes Xus ntxiv, mas cov thwj tim lub siab rov tsis kaj dua. Lawv xav nrog Huab Tais Yes Xus nyob mus li.
Cov kwv tij Hmoob sawv daws, Huab Tais Yes Xus mus cuag Huab Tais Leej Txiv, tab sis nws tsis tso cov thwj tim ua ntsuag. Huab Tais Yes Xus hais tias thaum nws mus lawd, nws yuav xa Leej Ntuj Plig tuaj nplij sawv daws lub siab kom rov kaj. Leej Ntuj Plig yuav nrog nraim cov thwj tim. Leej Ntuj Plig yuav tsom kev rau cov thwj tim lub tswv yim kom pom thiab paub txog qhov tseeb.
Kwv tij Hmoob sawv daws, thaum twg peb muaj Huab Tais Yes Xus nrog nraim peb mas peb lub siab yuav kaj tuaj, thaum twg peb tso Huab Tais Yes Xus pov tseg mas peb lub siab yuav ntxhov. Li ntawd, peb thiaj nyiam thov Huab Tais Tswv Ntuj xa Leej Ntuj Plig tuaj kaj peb siab tas zog.
Cov Hmoob sawv daws, lub neej nyob hauv ntiaj teb no yog lub neej taug kev mus kom txog Tswv Ntuj lub Ceeb Tsheej, yog lub neej nyob ib pliag xwb. Lub neej peb yuav nyob mus li mas yog pem Ntuj Ceeb Tsheej. Nyob ntawd, peb lub siab yuav xyiv fab, tsis muaj kev iab siab ntxhov siab vim tias peb tau nrog Huab Tais Yes Xus nyob mus li.
