ZAJ NYEEM HNUB TIM 7 LUB 10 HLI 2024
HNUB NCO TXOG LEEJ NIAM SAW MAB LIAB
COV LUS NYOB HAUV LUS KAS NTAWV MOO ZOO (LK 10: 25-37)
Kwv tij Hmoob sawv daws, lub Moo Zoo nej hnov hauv hnub no mas peb hais tias yog zaj ‘tus Xas Mas Lias siab zoo’. Nyob hauv zaj no nej yuav hnov 2 lo lus zoo li no:
Lo lus tim 1 hais tias ‘leej twg yog tus nyob ze kuv?’
Lo lus tim 2 hais tias ‘leej twg ua tus nyob ze tus neeg uas poob rau hauv tub sab txhais tes?’
Kwv tij Hmoob, nyob hauv peb sawv daws mas peb yeej muaj lo lus nug peb tias ‘leej twg los yog tus twg thiaj yog tus nyob ze kuv, los yog kuv tus phooj ywg?’
Thaum peb nug li no, mas nyaj peb yuav rov hais rau peb tias ‘yog tus ua zoo rau kuv’ los yuav hais tias ‘yog tus raug zoo nrog kuv’, los yuav hais tias ‘yog tus swm kuv’.
Peb nyias yuav muaj nyias lus teb.
Hnub no, tej zaum tus kws lij choj tuaj nug Huab Tais Yes Xus ntawd, mas nws kuj yuav xav raws li peb xav.
Huab Tais Yes Xus tsis hais tias tus nyob ze peb yog leej twg. Tab sis Huab Tais Yes Xus nug tias ‘tus nyob ze tus neeg raug xwv txheej yog leej twg?’
Huab Tais Yes Xus tsis xav kom peb nrhiav saib tus twg thiaj yog tus nyob ze peb. Huab Tais Yes Xus xav kom peb nrhiav saib peb puas yeem ua tus nyob ze cov neeg raug txom nyem.
Tus neeg raug tub sab ntaus tshuav tuag, nws txom nyem loj, nws vam kom muaj ib tug neeg pab nws, nws tos saib leej twg yuav ua tus nyob ze nws.
Tus Leej Choj pom tus neeg raug txom nyem, nws ntsia ntsia ces nws lug kev hla mus. Tus Les Vis tuaj txog, nws pom tus neeg raug txom nyem nti nti hauv pem teb, nws kuj lug kev hla mus lawm thiab.
Nkawd ob tug no xav li cas, nkawd thiaj tsis nqes tes pab tus neeg tshuav tuag ntawd? Peb tsis paub vim Huab Tais Yes Xus tsis hais dab tsi txog qhov nkawd xav.
Tab sis raws li peb xav, mas nyaj nkawd yuav hlub tus neeg raug mob ntawd, tab sis ntshai nkawd xav tias tsis tsim nyog pab, los tej zaus nkawd yuav xav tias nkim sij hawm pab, los tej zaus nkawd xav tias kuv pab mas tsam kuv ib ce lo nws cov ntshav ces yuav ua rau kuv tsis huv.
Kwv tij Hmoob, peb tsis paub.
Tab sis tus neeg Xas Mas Lias dhau kev tuaj txog, nws tsis xav dab tsi ntau, nws txav los ze tus neeg raug mob, nws hliv roj thiab cawv rau cov qhov txhab, nws muab qwv thiab coj tus neeg raug mob ntawd mus tu.
Kwv tij, Huab Tais Yes Xus nug tias “Raws li koj xav, leej twg ua tus nyob ze tus neeg uas poob rau hauv tub sab txhais tes?”
Tus kws lij choj teb tias “Yog tus uas tau khuv leej tus raug mob.”
Kwv tij Hmoob, nej ne nej puas xav li tus kws lij choj?
Qhov sib txawv ntawm 3 tus neeg Huab Tais Yes Xus hais ua piv txwv no yog dab tsi?
Tsis yog lub siab hlub tus neeg raug xwv txheej, tab sis yog txoj kev khuv leej tus neeg raug xwv txheej.
Thaum peb pom ib tug neeg txom nyem, mas peb yeej hlub nws tiag, tab sis yuav muaj pes tsawg leeg yuav khuv leej tus neeg raug txom nyem.
Hnub no, Huab Tais Yes Xus xav kom peb ua tus neeg hlub thiab khuv leej cov txom nyem dua peb. Tsis txob tos luag hlub thiab khuv leej peb tso, ces peb mam hais tias ‘nws yog tus nyob ze kuv’.
Peb yuav xub ua tus nyob ze lwm tus.
