ZAJ NYEEM HNUB TIM 6 LUB 2 HLIS 2025
HNUB NCO TXOG LEEJ NTSHIAB PAJ LUG MIS KIS
HN 12: 1-19, 21-24; MK 6: 7-13
Kwv tij Hmoob, hnub no peb hnov Mas Kos piav tias Huab Tais Yes Xus hu 12 tus thwj tim nrog nraim nws los cuag nws, Huab Tais Yes Xus pub hwj huam ntiab dab tsis huv rau lawv, Huab Tais Yes Xus qhia lawv, thiab xa lawv mus tshaj Lo Lus.
Ua ntej no peb hnov tias Huab Tais Yes Xus xaiv lawv 12 leeg no ntawm tas nrho cov neeg tuaj mloog Huab Tais Yes Xus, kom lawv 12 tug no tau nyob ze Huab Tais Yes Xus.
Kwv tij Hmoob, ua cas Huab Tais Yes Xus thiaj xaiv lawv los nyob ze nws? Ntawm peb mas peb yuav ua li cas thiaj yuav tau nyob ze Huab Tais Yes Xus?
Peb hais tias peb yog ib tug neeg ntseeg, tau txais lub Cim Ntxuav, tau txais lub Cim Txhab Zog, tau txais lub Cim Daws Txham, tau txais lub Cim Yug. Tab sis kwv tij, peb puas yog Huab Tais Yes Xus ib tug tseem thwj tim tiag!
Peb pom tias muaj cov neeg raws Huab Tais Yes Xus coob, cov tuaj mloog Huab Tais Yes Xus kuj coob, tab sis muaj tsawg tswg leej thiaj tau nyob ze Huab Tais Yes Xus, tau lub npe tias yog Huab Tais Yes Xus cov thwj tim.
Huab Tais Yes Xus xaiv 12 tug thwj tim los nyob ze kom tau pom Huab Tais Yes Xus tus yam ntxwv, kom to taub Huab Tais Yes Xus lub siab, ces lawv kawm ntawm Huab Tais Yes Xus. Thaum lawv muaj lub siab, muaj tus yam ntxwv xws li Huab Tais Yes Xus, mas Huab Tais Yes Xus mam xa lawv mus tshaj Lo Lus.
Tus yam ntxwv lawv kawm ntawm Huab Tais Yes Xus mas yog ‘nrauj lawv tus kheej’ tig mus ‘hlub lwm tus’; lawv txhob muab lawv tus kheej saib hlob, lawv tsum muab lwm tus neeg saib ua qhov loj mas lawv thiaj yuav pub txoj kev nyiam rau sawv daws tau.
Peb niaj hnub teev Ntuj, niaj hnub txais Tswv Ntuj Lo Lus, txais Huab Tais Yes Xus lub Cev; tab sis peb puas tau muab siab hlub cov neeg nyob ntawm peb ob cag, los niaj hnub no peb tseem muab peb saib hlob dua lwm tus?
Huab Tais Yes Xus pom tias txog lub sij hawm nws yuav xa pab 12 mus pab tshaj Lo Lus lawm, ces Huab Tais Yes Xus thiaj pub hwj huam rau lawv ntiab dab tsis huv thiab xa lawv mus. Yam lawv yuav nqa nrog lawv mus, tsis yog nyiaj txiag, tsis yog txhiam xws; tab sis qhov lawv nqa mus yog lawv txoj kev tso siab rau Tswv Ntuj thiab lub siab nyiam cov neeg txom nyem. Lawv txoj kab xwm yog qhia tsoom sid kom paub txog lub Moo Zoo lawv coj tuaj, tsis yog yuam tsoom sid kom yuav raws li hais. Huab Tais Yes Xus thiaj hais tias “Yog qhov chaw twg tsis txais nej thiab tsis mloog nej, mas nej tso qhov chaw ntawd tseg. Nej nchos cov plua av lo nej qab xib taws pov tseg cia ua tim khawv txiav txim rau lawv.”
