ZAJ NYEEM HNUB TIM 4 LUB 9 HLI 2024
HNUB PLAUB LUB LIS PIAM 22 CAIJ NYOB NRUAB XYOO
COV LUS NYOB HAUV LAS KAS NTAWV MOO ZOO (LK 4: 38-44)
Kwv tij Hmoob sawv daws, thaum Huab Tais Yes Xus nrog sawv daws mus hauv lub tsev txoos tas, qhov Huab Tais Yes Xus ua ntxiv yog los hauv Pob Zeb tsev kom tau nrog lawv tham, Huab Tais Yes Xus tau kho Pob Zeb niam tais, thiab kho cov neeg mob lawv coj tuaj cuag nws. Tag kis, Huab Tais Yes Xus tawm mus rau ib qho xu kev, ces nws teev Ntuj. Teev Ntuj tas mas Huab Tais Yes Xus hais cov npawg kom nrog nws mus tshaj lub Moo Zoo.
Kwv tij Hmoob, hnub no lub Moo Zoo xav qhia rau peb tias Hnub Chiv thaum peb mus koom nrog ib zeej tsoom ua lub Txoos Txi Ntuj tas, peb yuav tau nrhiav lub sij hawm nrog sawv daws sib tham sib ntxiv tswv yim, tsis yog ua lub Txoos tas ces cia nyias mus nyias tsev zoo li ib pab neeg tsis sib paub.
Niaj hnub no peb puas ua zoo li ntawd? Peb puas tau qee lub sij hawm me me kom tau nrog tsoom neeg ntseeg tuaj sib sau ua ke teev Ntuj tham.
Cov kwv tij, Hnub Chiv peb tsuas yog mus ua lub Txoos Teev Ntuj xwb, los peb yuav mus ua cov hauj lwm zoo tsim koob hmoov thiab?
Huab Tais Yes Xus ua piv txwv rau peb tias tom qab ntawd nws kho cov neeg mob thiab ntiab dab rau lawv.
Yog li mas Hnub Chiv tsim nyog peb yuav ua cov hauj lwm tsim koob hmoov thiab. txawm tias peb tsis yog tus kws kho mob, tsis txawj ntiab dab; los peb kuj yuav ua qhov peb ua tau, xws li pab tu lub tsev teev Ntuj, pub zaub mov rau cov neeg txom nyem noj, pab tu cov me nyuam ntsuag, qhia ntawv rau cov xav kawm, thab tseem muaj ntau yam ntxiv.
Kwv tij, tsis tas li ntawd xwb, peb kuj yuav tau nrhiav ib lub zoo caij kom tau nrog Tswv Ntuj tham, cev peb cov hauj lwm rau Tswv Ntuj ua tus saib, thov lub dag lub tswv yim ntawm Tswv Ntuj.
Qhov kawg, yog tawm mus tshaj lub Moo Zoo rau lwm tus.
Kwv tij, Huab Tais Yes Xus tsis xav kom peb khaws nws lub Moo Zoo cia rau peb ib leeg paub xwb. Huab Tais Yes Xus xav kom peb coj mus tshaj rau sawv daws paub thiab.
Cov kwv tij, vam tias hnub no mus niaj hnub peb yuav yoog raws li Huab Tais Yes Xus tus piv txwv hauv lub Moo Zoo: koom nrog sawv daws teev Ntuj, nrog sawv daws sib tham, sib koom siab ua cov hauj lwm xis Tswv Ntuj siab, nyob ntsiag tos txuas lus nrog Tswv Ntuj, thiab sib txhib mus tshaj lub Moo Zoo.
