ZAJ NYEEM HNUB TIM 4 LUB 9 HLI 2025
HNUB PLAUB, LIS PIAM 22 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 5: 1-11)
Kwv tij sawv daws, peb yuav pom tias nyob rau hauv zaj no, Huab Tais Yes Xus lo lus muaj hwj chim heev. Huab Tais Yes Xus hais tias “Koj nquam nkoj mus lawm tom qhov dej tob, nej tso nej cov vas nqes mus puav ntses.”
Raws li neeg txoj kev xav thiab lawv lub peev xwm, mas ntshai yuav tsis tau lawm, lawv hais tias “Xib Hwb, peb twb khwv ib hmos tsis tau dab tsi. Tab sis yog vim koj hais, mas kuv yuav pov cov vas nqes mus.”
Qhov kawg lawv ua raws li Huab Tais Yes Xus hais, ces lawv ntes ntau ntses ntau heev ua rau lub vas yuav luag ntuag. Qhov no yog qhov uas nyob rau hauv Lus Kas ntawv Moo Zoo piav txog.
Kwv tij nej puas xav tias kev ua Huab Tais Yes Xus thwj tim yog yuav tsum mloog Huab Tais Yes Xus cov lus thiab kub siab ua raws li Huab Tais Yes Xus qhia, mas peb thiaj yuav pom lub hwj huam hauv Tswv Ntuj lo lus tawm tuaj.
Huab Tais Yes Xus cov thwj tim yuav tsum mus rau tom qhov dej tob, ces thiaj yuav puav tau ntses. Nqe lus no txhais tias peb yuav mus kom txog qhov tob nyob rau hauv neeg lub siab, yuav mus kom txog cov neeg uas ntshaw Tswv Ntuj txoj kev hlub. Yog peb ua tib zoo xav, mas peb yuav to taub Huab Tais Yes Xus nqe lus no, vim qhov chaw tob thiaj yog qhov chaw uas muaj ntses ntau. Thiab yog peb ntseeg ruaj khov txog Huab Tais lo lus, peb ua raws li Huab Tais Yes Xus qhia, ces lub luag hauj lwm thiaj yuav tiav mus zoo.
Nyob zoo sawv daws.
