ZAJ NYEEM HNUB TIM 31 LUB 12 HLIS 2025
HNUB NCO TXOG LEEJ NTSHIAB VAJ QHIA XIS VAWSTES
COV LUS NYOB HAUV ZAM NTAWV MOO ZOO (Z 1: 1-18)
Hnub no kuj los txog hnub kawg rau hauv lub xyoo lawm. Lub Xyoo laus dhau mus xyoo tshiab tawm tuaj, peb kuj ua tsaug rau Huab Tais Tswv Ntuj uas nws saib xyuas peb thiab tiv thaiv peb ntawm txoj kev phem kev tsis zoo, thiab ua tsaus rau txhua tsav txhua yam uas nkag los hauv peb lub neej.
Hnub no lub Moo Zoo hais txov Leej Lo Lus uas yog Tswv Ntuj Leej Tub nqes los nyob nruab nrab peb sawv daws, uas yog hais txog Huab Tais Yes Xus. Thiab kuj hais txog Zam Ntxuav Plig tuaj ua tim khawv txog qhov ntawd. Ntawv Moo Zoo hais tias “Zam tsis yog qhov pom kev tiam sis zam tuaj ua pov thawj txog qhov pom kev.”
Neeg ntiaj teb yog neeg siab tawv uas tsis ntseeg dab tsi yooj yim, li ntawd, Tswv Ntuj thiaj tau xa Zam xub tuaj ntaus thawj ua ntej, Zam tsis yog qhov pom kev, Zam tsis yog Tswv Ntuj, tiam sis, nws yog Tswv Ntuj tus Yaj Saub uas Tswv Ntuj xa tuaj tshaj txog qhov xwm zoo ua ntej, nws tuaj ua Huab Tais Yes Xus ntej, nws qw kom zeej tsoom tig los nrhiav Tswv Ntuj thiab qhib siab tos txais Tswv Ntuj Leej Tub yuav tuaj.
Li ntawd, lub ntsiab nyob rau hauv hnub no lub Koom Txoos kuj xav qhia peb kom peb to taub tias, lub xyoo laus dhau mus lawm, lub xyoo tshiab yuav tawm tuaj, thov kom peb qhib siab los txais tej yam tshiab tshiab uas Tswv Ntuj npaj tseg rau peb nyob rau lub xyoo tshiab uas yuav tawm tuaj no. Tswv Ntuj yuav foom koob hmoov rau peb, kom peb muaj lub neej nyob siab lug, kom peb khwv tau txaus noj txaus haus, kom peb txawj ua qhov zoo thiab txawj sib nyiam sib hlub.
Nws yuav pub qhov pom kev rau peb, kom peb txawj xam pom qhov zoo, qhov tsim nyog uas peb yuav taug mus lawm yav tom ntej, ces peb yuav ua tim khawv txog Tswv Ntuj qhov pom kev nyob rau hauv lub neej tshiab no. Peb coj lub neej sib nyiam sib hlub, peb tsis txhob qaug rau tej yam phem yam tsis zoo.
