ZAJ NYEEM HNUB TIM 31 LUB 1 HLIS 2024
HNUB NCO TXOG LEEJ NTSHIAB ZAM NPOS KOS
COV LUS NYOB HAUV MAS KOS NTAWV MOO ZOO (MK 6: 1-6)
Kwv tij Hmoob sawv daws, lub Moo Zoo hnub no qhia peb tias Huab Tais Yes Xus ua tsis tau hwj huam nyob hauv lub zos Nas Xas Les.
Tim li cas nyob ntawd, Huab Tais Yes Xus thiaj ua tsis tau hwj huam?
Ntawv Moo Zoo piav tias cov neeg hauv lub zos Nas Xas Les pom Huab Tais Yes Xus puag thaum yau los txog niaj hnub no, lawv hais tias lawv paub Huab Tais Yes Xus txaus lawm, ces thaum lawv pom tias ua cas ziag no Huab Tais Yes Xus yuav muaj lub siab thoob tsib thiab lawv kuj hnov tias Huab Tais Yes Xus ua tau hwj huam, mas lawv ua xyem xyav thiab lawv tsis ntseeg txog Huab Tais Yes Xus.
Cov kwv tij Hmoob, nyob hauv peb lub neej yeej pom muaj zoo li lub Moo Zoo hnub no tiag: muaj tej tus neeg peb swm nws, peb hais tias peb paub nws zoo; ces thaum nws hais lus dab tsi mas peb yeej tsis tshua mloog nws cov lus pes tsawg, peb xub mloog tus tuaj lwm qhov cov lus dua.
Tab sis hnub no Huab Tais Yes Xus kom peb hloov lub tswv yim no dua tshiab, mas peb thiaj yuav tau pom nws ua hwj huam. Vim tus nyob ze peb mas nws kuj yuav paub peb zoo dua thiab, nws yuav nkag siab peb zoo dua thiab; yog li no Huab Tais Leej Txiv thiaj xa nws Leej Tub Twm Zeej nqes los txais lub cev ua neeg zoo li peb nyob nruab nrab hauv peb.
Cov kwv tij Hmoob, thaum muaj ib tug tub tshaj Ntuj Lus tuaj nyob nrog peb lawd, peb txhob xav tias peb paub nws zoo lawm, ces peb tsis mloog nws, tsis yuav nws cov lus qhia. Yog peb ua li no mas yog zoo li peb tab tom muab hlob, peb tab tom tsa peb cai, ces yuav ua rau peb lub siab tsis kam qhib rau Huab Tais Yes Xus los ua hwj huam nyob hauv peb.
Peb tsis ntseeg nws, tiam sis peb yuav tau ntseeg txog cov lus nws qhia rau peb vim yog cov lus tuaj ntawm Tswv Ntuj tuaj.
Yog peb tsis muaj lub siab ntseeg, ces peb yuav tsis pom Huab Tais Yes Xus lub hwj huam ua nyob hauv peb.
Nyob zoo sawv daws.
