ZAJ NYEEM HNUB TIM 30 LUB 5 HLIS 2024
HNUB TSIB LUB LIS PIAM 8 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 10: 46-52)
Kwv tij Hmoob sawv daws, lub Moo Zoo hnub no piav txog thaum Huab Tais Yes Xus lawv tuaj txog lub nroog Yes Lis Kos. Nyob ntawd, muaj ib tug dig muag thov khawv lub npe hu ua Npas Tis Mes. Nws hnov zej zog cav tias Huab Tais Yes Xus tuaj txog lawm, nws ntseeg tias Huab Tais Yes Xus ua tau hwj huam kho nws kom rov pom kev, ces nws qw nrov nrov kom Huab Tais Yes Xus hnov thiab pab kho nws. Thaum kawg nws rov pom kev raws li nws lub siab ntseeg.
Kwv tij Hmoob sawv daws, zaj no zoo qhia dab tsi rau peb?
Zaj no qhia peb tias niaj hnub no peb ntiaj teb neeg ua neej nyob hauv txoj kev tsaus, tsis yog vim peb dig muag tab sis vim peb ntsia tsis pom lwm tus thiab tsis liam fab hlub lwm tus; zoo li thaum cov neeg hnov tus dig muag hu nrov nrov mas lawv ib txhia tseem cem nws kom ua twj ywm thiab, ua cas lawv tsis pab tuav tes coj tus dig muag mus nrhiav Huab Tais Yes Xus.
Peb coob leej zoo li ntawd tiag. Peb ntsia tsis pom lwm tus kev txom nyem!
Kwv tij Hmoob, peb tig los saib tus dig muag, saib nws ua zoo li cas. Nws ntseeg tias Huab Tais Yes Xus pab tau nws, nws tsis pom kev thiab tseem tsis muaj leej twg pab nws, tsis kav nws tsis cia li; nws haj yam hu kom nrov dua qub, nws ua tiag raws li nws lub peev xwm yuav ua tau. Thaum muaj neeg los hais rau nws tias “Yes Xus hu koj. Koj sawv mus tom Yes Xus”, mas nws muab lub tsho ntev pov rhees, ces nws cia li mus cuag Huab Tais Yes Xus.
Cov kwv tij, peb puas yuav ua zoo li tus dig muag Npas Tis Mes no, peb puas muab siab rau nrhiav Huab Tais Yes Xus, peb puas tso tag nrho peb lub cuab tam es sawv tsees mus cuag Huab Tais Yes Xus, peb puas hle tus qub neeg pov tseg es ho hnav dua tus neeg tshiab Huab Tais Yes Xus pub rau peb.
Hnub no, peb yuav thov Huab Tais Yes Xus qhib peb lub qhov muag, kom peb ntsia pom Huab Tais Tswv Ntuj thiab ntsia pom cov neeg nyob puag ncig peb.
