ZAJ NYEEM HNUB TIM 30 LUB 1 HLIS 2025
HNUB TSIB LUB LIS PIAM 3 CAIJ NYOB NRUAB XYOO
HN 10: 19-25; MK 4: 21-25
Kwv tij Hmoob, tom qab Huab Tais Yes Xus hais txog thaj av zoo ua rau cov nplej txi txiv tas, Huab Tais Yes Xus hais tias “Thaum yus taws ib lub teeb nqa los, yus puas muab txawb hauv qab txees los hauv qab txag? Tsis yog yuav muab txawb saum tus ncej teeb lod?”
Huab Tais Yes Xus muab Lo Lus piv rau lub noob nplej. Huab Tais Yes Xus kuj muab Lo Lus piv rau lub teeb, ces lub Moo Zoo hnub no thiaj hais tias thaum peb tau hnov Lo Lus lawm, peb puas muab Lo Lus los kaj peb lub siab, los peb muab Lo Lus zais cia tsis pub kaj rau peb.
Yog peb muab Lo Lus los kaj peb mas kuj yog peb muab lub teeb tsawb saum tus ncej teeb kom tsom rau lwm tus pom kev. Yog peb muab Lo Lus zais cia ces peb kawg yuav nyob hauv kev tsaus ntuj thiab yuav ua kom lwm tus pom kev tsis tau. Yog li Huab Tais Yes Xus thiaj hais tias “Nej ceev faj txog tej yam nej hnov. Ntuj yuav xuas lub tawb uas nej luj rov los luj rau nej.”
Kwv tij, thaum peb txais Lo Lus mas yog peb txais lub teeb, ces tsim nyog peb yuav muab coj los siv tsom kev rau peb lub neej. Peb mloog Huab Tais Yes Xus cov lus qhia tas, peb kuj yuav khaws coj los ua raws mas peb thiaj yuav ua tau tus piv txwv zoo rau cov neeg nyob ib ncig peb; thaum ntawd zoo li peb muab lub teeb tso saum tus ncej teeb kom pom kev rau lub nrog tsev.
Nyob rau lub zim txwv no, mas tas ntiaj teb cav tias yog lub caij kev tsim txiaj thaub qab; sawv daws tso kev ua qhov zoo pov tseg, sawv daws cav tias tsis muaj Tswv Ntuj, sawv daws hais tias neeg tuag lawm ces txhua yam hauj lwm zoo thiab phem yaj ntshis tas, sawv daws hais tias me nyuam yug los vim niam txiv txoj kev ntshaw ces me nyuam tsis tas yuav saib xyuas niam txiv rau yav laus.
Kwv tij, lub ntuj nyem no mas ntiaj teb neeg muaj lub tswv yim xws li hais los no. Yog li thiaj yog peb cov neeg ntseeg txog Yes Xus txoj kab xwm yuav ua tus piv txwv rau ntiaj teb tias vim Tswv Ntuj kev hlub mas Tswv Ntuj thiaj tsim lub sim ceeb. Tswv Ntuj tsim tib neeg kom los ua qhov zoo tiam sis vim tib neeg tsis mloog lus mas tib neeg thiaj poob tsim. Tswv Ntuj xav tsa tib neeg lub tsim mas Tswv Ntuj thiaj qhia txoj hauv kev ua neeg tsim txiaj. Tswv Ntuj tsis xav cia tib neeg nyob hauv kev tsaus mus li mas thiaj xa Leej Tub tuaj npo neeg hauv kev tsaus coj mus nyob hauv qhov pom kev uas yog Tswv Ntuj. Muaj ib hnub twg Tswv Ntuj kuj yuav saib neeg cov hauj lwm thaum tseem muaj txoj sia nyob tias neeg puas ua zoo rau lwm tus, neeg puas nyiam lwm tus.
Kwv tij Hmoob, Huab Tais Yes Xus txhib peb cov uas yog nws cov thwj tim kom peb ua tim khawv zeem tseeb txog tej ntawd, Huab Tais Yes Xus thiaj hais tias “Nej kawm ntawm kuv, nej nrauj nej tus kheej ces nej kwv tus ntoo cuam lawv kuv qab.”
Muaj tej tus yuav hais tias ua Yes Xus thwj tim los yog ua neeg ntseeg mas tsis yooj yim kiag li, tseem raug kev txom nyem kev sab; ces lawv thiaj hais tias “Kuv tsis xav ntseeg ntxiv vim kuv ntshai tsam ua nyiaj tsis tau.”
Lo lus no zoo li tej lus peb nquag hnov tias ua neeg zoo mas nyuaj, ua neeg phem thiaj yooj yim.
Kwv tij, Tswv Ntuj tsis yuam kom peb los ntseeg txog Yes Xus tab sis yog Tswv Ntuj kev nyiam nqua hu peb kom los ua Huab Tais Yes Xus cov thwj tim. Li ntawd, txoj kev nyiam thiaj hu peb tsis tseg kom ua tim khawv txog Tswv Ntuj kev nyiam peb, kom peb ua lub teeb pom kev rau cov nyob ib ncig. Peb nyob tsis tau mas peb thiaj nqes tes ua cov hauj lwm zoo, cov hauj lwm sis nyiam sis hlub.
