ZAJ NYEEM HNUB TIM 4 LUB 6 HLI 2024
HNUB PEB LUB LIS PIAM 9 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 12: 13-17)
Kwv tij Hmoob sawv daws, hnub no Huab Tais Yes Xus hais ib lo lus tias “Yam twg yog Xes Ntxas tug ces nej muab rau Xes Ntxas. Yam twg yog Tswv Ntuj tug, mas nej muab rau Tswv Ntuj.”
Huab Tais Yes Xus hais cov lus no vim hnub ntawd, cov Fas Lis Xais thiab cov Hes Los Dias xav nrhiav lus kom Huab Tais Yes Xus rau cov nom tswv Los Mas, ces lawv nug saib tsoom His Xas Lais puas yuav them se rau cov Los Mas. Yog Huab Tais Yes Xus teb tias tsis them se, mas cov lus no yuav raug tsoom His Xas Lais siab tab sis yuav tsis haum rau cov Los Mas txoj cai lij choj, yog Huab Tais Yes Xus hais tias tsum them se rau co Los Mas, mas lawv yuav tau lus hiam tias Huab Tais Yes Xus npuab cov Los Mas tog.
Huab Tais Yes Xus tsis yog paub hauv cov neeg ntawd lub siab tias xav li cas xwb, Huab Tais Yes Xus tseem hais mus raws qhov ncaj thiab qhov tseeb thiab. Huab Tais Yes Xus hais tias “Nej saib hauv nej lub txiaj nyiag mas, tus duab nyob hauv yog leej twg tus?”
Lawv hais tias yog Xes Ntxas tus, ces Huab Tais Yes Xus thiaj hais tias “Nej pom tias tus duab hauv lub txiaj nyiag yog Xes Ntxas tus duab, yog li lub txiaj ko kuj yog Xes Ntxas li.”
Kwv tij Hmoob sawv daws, peb ua neej nyob mas peb yeej yuav ua raws li lub teb chaws txoj cai lij choj xws li Huab Tais Yes Xus hais ntawd. Tab sis zaj no muaj dab tsi zoo qhia rau peb?
“Yam twg yog Tswv Ntuj tug, mas nej muab rau Tswv Ntuj.”
Nyob hauv peb lub neej, yam twg yog Tswv Ntuj tug? Puas yog peb lub cev? Puas yog peb txoj sia? Puas yog peb cov hauj lwm? Peb cov neeg ntseeg mas peb hais tias txhua yam hauv peb yog tuaj ntawm Tswv Ntuj tuaj! Peb lub cev, peb txoj sia, peb rab peev xwm, peb lub laj lim, peb cov hauj lwm; txhua yam ntawd puav leej yog Tswv Ntuj pub rau peb.
Peb yuav muab tas txhua yam ntawd cev rau Tswv Ntuj.
Kwv tij Hmoob sawv daws, peb paub tias Tswv Ntuj yog kev nyiam. Tswv Ntuj muab nws txoj kev nyiam los tsim peb. Tswv Ntuj nyiam peb mas nws thiaj tso nws Leej Tub los tuag kom peb rov mus cuag tau Tswv Ntuj. Li ntawd, yog peb xav muab yam yog Tswv Ntuj rov rau Tswv Ntuj, mas peb yuav tau ua lub neej nyob hauv kev nyiam; yog hlub thiab sib tsob hwb li Huab Tais Yes Xus xub ua rau peb pom.
