ZAJ NYEEM HNUB TIM 3 LUB 5 HLIS, HNUB UA HMOOV LEEJ NTSHIAB FIS LIS POS THIAB YAS KOS
COV LUS NYOB HAUV ZAM NTAWV MOO ZOO (Z 14: 6-14)
Kwv tij Hmoob, hnub no peb cov neeg ntseeg yuav ua hmoov hwm Leej Ntshiab Fis Lis Pos thiab Leej Ntshiab Yas Kos. Nkawd yog pab 12 hauv Huab Tais Yes Xus cov thwj tim. Leej Ntshiab Fis Lis Pos yog cov neeg hauv lub zos Npes Xais Das xws li Pob Zeb, As Nres, Yas Kos thiab Zam. Hais txog Leej Ntshiab Yas Kos tus me mas nws yog Huab Tais Yes Xus cov kwv tij, nws txiv yog As Fes As.
Cov kwv tij, nyob hauv Ntawv Moo Zoo peb pom tias Leej Ntshiab Fis Lis Pos thiab lwm tus thwj tim, lawv nrog nraim Huab Tais Yes Xus tab sis lawv tsis to taub tias Huab Tais Yes Xus yog Tswv Ntuj Leej Tub. Ces thaum Huab Tais Yes Xus hais qhia rau lawv, Fis Lis Pos thiaj hais tias “Huab Tais, koj pub peb pom Leej Txiv, mas peb thiaj txaus siab.”
Huab Tais Yes Xus thiaj hais rau nws tias “Tus twg pom kuv, mas nws pom Leej Txiv.” Ces Huab Tais Yes Xus hais kom lawv ntseeg nws, vim cov hauj lwm nws tau ua.
Kwv tij Hmoob sawv daws, peb txhob ua xws li Leej Ntshiab Fis Lis Pos hauv cov lus hnub no, peb txhob twv Tswv Ntuj kom tawm kiag los rau peb pom tso, mas peb mam ntseeg.
Huab Tais Yes Xus twb qhia peb tias yog peb pom nws ces zoo li peb pom Leej Txiv Tswv Ntuj lawm.
Huab Tais Yes Xus twb hais ntxiv tias peb yuav pom nws nyob hauv peb cov kwv tij, hauv cov neeg txom nyem, hauv peb cov yeeb ncuab, thiab nyob hauv nws cov hauj lwm.
Li ntawd, niaj hnub mas peb yuav nrhiav Huab Tais Yes Xus hauv cov neeg ib puag ncig peb, thiab peb yuav tsom Tswv Ntuj nyob hauv peb rau lwm tus pom nyob hauv peb cov hauj lwm, hauv peb lo lus, thiab hauv peb lub tswv yim.
