ZAJ NYEEM HNUB TIM 29 LUB 8 HLI 2025
HNUB NCO TXOG ZAM NTXUAV PLIG RAUG TXIAV TAUB HAU
COV LUS NYOB HAUV MAS TAIS NTAWV MOO ZOO (MK 6: 17-29)
Kwv tij sawv daws, yog vim Hes Los lo lus uas nws tau hais thaum nws tab tom qaug cawv, nws tsis ceev faj, ces nws thiaj yuam kev rau tus poj vaj Hes Los Dias nkawd ob niam tub, ua rau Zam Ntxuav Plig tau tuag. Zam Ntxuav Plig yog ib tug Yaj Saub uas nws tig nrob qaum rau txoj kev phem kev txhaum, ces nws thiaj raug tua, zoo li coob tus Yaj Saub uas lawv tuaj yeem taug txoj kev ncaj, tab yog lawv txoj sia yuav tu, tsis kav lawv coj ncaj rau lawv txoj hauj lwm. Zam lub suab qw hauv teb chaws suab puam, nws tshaj kom neeg tig los yuav lub siab tshiab, nws tshaj txoj kev zoo, nws thuam txoj kev phem, nws hais qhov tseeb, tab yog nws lo lus tseeb yuav ua rau nws poob hauv txoj kev tuag, tsis kav nws tsis ntshai.
Kwv tij sawv daws, Huab Tais Ntuj kuj hu peb los ua Yes Xus thwj tim kom peb coj lub neej taug hauv qhov tseeb, peb ua qhov yog, peb txhob ntshai cov neeg tua tau peb lub cev, tab sis tua tsis tau peb tus ntsuj plig. Peb yog cov neeg ntseeg Ntuj peb yuav tsum coj lub neej ua ib tug neeg ntseeg Ntuj zoo, tab txawm yuav ntsib xwm txheej dab tsi, tsis kav peb yuav tsis tig rov qab, peb yuav tiv mus txog qhov kawg, ces peb thiaj yuav yeej, vim Leej Ntshiab Paj Lug tau hais meej tias, txoj kev txom nyem nyob ntiaj teb no, piv tsis tau Tswv Ntuj lub Ceeb Tsheej. Tswv Ntuj lub Ceeb Tsheej yog qhov paj tshaj uas loj dua peb tej kev txom nyem nyob ntiaj teb no. yog peb tsis muaj lub siab ntseeg ruaj khov tiag, mas peb ceeb laj mus txog Tswv Ntuj lub Ceeb Tsheej kawg.
Peb thov Tswv Ntuj txhawb peb tsoom ntseeg sawv daws lub zog, kom peb muaj peev xwm tiv yeej txoj kev phem kev txhaum, zoo li Leej Ntshiab Zam Ntxuav Plig, uas nws, tuaj yeem tuag, tab sis, nws tis tuaj yeem ua txhaum.
Nyob zoo sawv daws.
