Hnub tim 29 lub 3 hlis 2025
Hnub Xya, lis piam 3 caij Plaub Caug.
LK 18: 9-14
Kwv tij Hmoob sawv daws, peb yuav paub tau li cas tias thaum peb teev Ntuj mas peb cov lus thov Ntuj ntxim los tsis ntxim Tswv Ntuj siab. Hnub no Huab Tais Yes Xus thiaj hais zaj paj lug txog 2 tus neeg nce mus teev Ntuj pem Yes Lus Xas Les. Ib tug nws xav tias nws xwb thiaj yog neeg zoo neeg ncaj, ces nws muab hlob ntsia tsis pom luag tej, nws thov Ntuj mas nws cav txog nws qhov zoo rau Tswv Ntuj mloog, nws thuam lwm tus rau Tswv Ntuj mloog, nws tsis nco pom nws cov txhaum ces nws tsis thov Tswv Ntuj zam rau nws. Tus twg thov Ntuj li no mas Tswv Ntuj tsis mloog.
Hnub no lub Moo Zoo thiaj ntuas peb tias thaum twg yog peb muab hlob rov tsa peb loj dua luag, thaum ntawd peb dig muag tsis pom kev. Tab sis thaum twg peb ua neeg me txo yus qis, thaum ntawd peb pom tias peb yog neeg tsis muaj zog, yog neeg vam txog Tswv Ntuj pab, yog neeg tos Tswv Ntuj khuv leej, yog neeg vam Tswv Ntuj lub txiaj ntsim tuaj cawm. Li ntawd, peb khaws cov lus hnub no mus xav, peb thov Ntuj rau luag tej, peb thov Tswv Ntuj zam rau lawv thiab rau peb. Nyob zoo sawv daws.
