HNUB TIM 29 LUB 11 HLIS; HNUB RAU LUB LIS PIAM 34 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 21: 29-33)
Kwv tij Hmoob sawv daws, hnub no Huab Tais Yes Xus hais ib zag paj lug txog tsob txiv ncuav pias. Huab Tais Yes Xus hais tias thaum peb ntsia tsob txiv ncuav pias pib hlav nplooj mas peb yuav paub tias ze lub caij ntuj sov lawm.
Nyob hauv peb haiv Hmoob lub neej yav qub qab, peb tsis muaj daim ntawv xam hnub xam hli, peb xav paub tias lub caij peb caug puas tau los txog los tsis tau, mas peb ntsia cov nroj puav cai; yog thaum twg puav cai tawg paj dawb vog mas thaum ntawd peb paub tias txog lub caij peb caug lawm, lub xyoo tshiab los txog lawm.
Kwv tij Hmoob sawv daws, peb ntsia tej nyob ib puag ncig peb mas ua rau peb mem tau lub caij nyoog.
Hnub no Huab Tais Yes Xus thiaj hais zaj paj lug nej tau hnov tas los lawd; yog Huab Tais Yes Xus muab piv rau lub caij ntiaj teb yuav kawg.
Yog peb tsuas mloog cov lus hauv lub Moo Zoo li nyob hauv hnub no xwb, mas peb yuav tsis to taub tias yuav muaj xwm dab tsi ua kom paub tias ze lub caij Tswv Ntuj lub Ceeb Tsheej los txog ze lawm.
Peb tsum rov mus mloog cov lus hauv lub Moo Zoo nag hmo; yog Huab Tais Yes Xus hais rau cov thwj tim tias “Lub caij Neeg Leej Tub yuav tuaj mas tsoom neeg nyob ntiaj teb yuav raug xwv txheej loj; dej ntuj yuav nphau, lub ntuj yuav ua zog koog.”
Kwv tij Hmoob, thaum tej xwm phem tuaj raug lub ntiaj teb, mas kom peb paub tias ze lub caij kawg lawm.
Peb sim ntsia lub ntiaj teb nyem no, saib puas muaj xws li Huab Tais Yes Xus tau hais tseg?
Yeej muaj tiag. Peb pom tias muaj tsov rog, muaj dej nyab ntau qhov chaw, muaj tej kab mob tshiab tshiab tuaj raug rau neeg. Tej no puav leej qhia peb tias yuav txog lub caij Huab Tais Yes Xus yuav rov los lawm tiag.
Kwv tij Hmoob sawv daws, peb pom tej xwm li hais los no, puas yuav ua rau peb ntshai.
Yeej ntshai, tab sis Huab Tais Yes Xus tsis xav kom peb khaws tej ntawd los ua chaw ntxhov siab. Huab Tais Yes Xus xav kom peb ntsia tej xwv txheej ntawd, ces yuav ua ib lub cim rau peb kom peb hloov siab tshiab; kom peb npaj tus kheej kom txhij tos hnub kawg ntawd.
Kwv tij Hmoob, peb cov ntseeg mas peb hais tias hnub ntiaj teb kawg yog hnub peb tso lub ntiaj teb no tseg thiab yog hnub lub ntiaj teb hlob tiav mus txog qhov xaus. Peb hais tias hnub Neeg Leej Tub uas yog Huab Tais Yes Xus yuav rov los mas yog hnub peb ua hmoov tsuj xeeb Yes Xus thiab yog hnub lub ntiaj teb kawg.
Peb tsis paub tias hnub ntiaj teb kawg yuav los txog sai los qeeb, yuav los txog lub sij hawm twg; tab sis peb paub tias hnub ua hmoov tsuj xeeb Yes Xus yog hmo tim 24 lub 12 hlis; yog lub hli tom ntej no.
Li ntawd, peb thiaj yuav xaiv 4 lub Lis Piam ua ntej los npaj peb lub siab lub tswv yim kom ntshiab tos tus me nyuam Yes Xus yug los; tsis yog los nyob hauv lub dab zaub nyuj, tiam sis yog los nyob hauv peb lub neej.
