ZAJ NYEEM HNUB TIM 28 LUB 5 HLIS 2024
HNUB PEB LUB LIS PIAM 8 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 10: 28-31)
Kwv tij Hmoob sawv daws, nag hmo tus hluas nplua nuj nug Huab Tais Yes Xus tias yuav ua dab tsi thiaj yuav tau txoj sia nyob mus li, mas Huab Tais Yes Xus hais rau nws kom mus muab lub cuab tam muag pub rau cov neeg tsis muaj, ces nws los ua Huab Tais Yes Xus ib tug thwj tim. Hnub no, Pob Zeb thiaj hais rau Huab Tais Yes Xus tias lawv yog cov tso ib puas tsav yam tseg, tsis hais vaj tse, niam txiv, los poj niam me nyuam.
Kwv tij Hmoob, yog peb saib tib zaj no tab sis yog raws li tus Hauv Paus Xa Lus Mas Tais phau Ntawv Moo Zoo, peb yuav paub tias Pob Zeb hais ntxiv tias lawv tso ib puav tsav yam tseg, mas thaum kawg lawv yuav tau dab tsi, mas Huab Tais Yes Xus thiaj teb tias lawv yeej yuav tau txais tej lawv tso tseg ntawd ntxiv li 100 npaug thaum tseem nyob hauv ntiaj teb no, tab sis lawv yuav tau txais ib yam ntxiv yog kev raug hiam. Txawm li ntawd, los lawv yuav zoo siab vim lawv yuav tau txais txoj sia nyob mus li.
Tab sis muaj ib lo lus Huab Tais Yes Xus hais ntxiv rau cov thwj tim tias “Coob leej ua luag ntej yuav tuaj puag tom qab, coob leej ua luag qab yuav tuaj tom ntej”, yog Huab Tais Yes Xus xav qhia lawv kom txhob ua neeg muab hlob khav theeb tias yus xwb thiaj yog tus ntseeg txog Yes Xus zoo dua luag. Thaum peb xav li ntawd yuav ua rau peb tsis nco faj, ces qhov kawg peb yuav poob ua tus tom qab.
Kwv tij Hmoob sawv daws, lub Moo Zoo hnub no kuj zoo ntuas peb kom mloog Huab Tais Tswv Ntuj lub suab hu peb mus ua Tswv Ntuj txoj hauj lwm raws li Huab Tais Tswv Ntuj pom zoo, tej tus raug hu mus ua Leej Choj, tej tus raug hu mus ua Leej Phauj, tej tus ua Xib Hwb, tej tus ua tub tshaj Ntuj Lus, tej tus ua pej xeem ntseeg. Huab Tais Tswv Ntuj hu peb ib tug txawv ib tug, tab sis muaj ib yam zoo tib yam; yog ua lub neej tsom kom lwm tus tau pom txog Huab Tais Tswv Ntuj kev nyiam kev hlub.
Kwv tij Hmoob, nej cov mloog peb lub xov tooj cua ZOO TSWV ZOV YAJ feebm coob yog pej xeem ntseeg, nej muaj poj muaj se, muaj txij muaj nkawm, muaj niam muaj txiv, muaj me tub me nyuam. Nej tsis tas yuav tso lawv pov tseg, es thiaj yuav raws Huab Tais Yes Xus qab tau. Nej yeej meem hlub lawv, saib xyuas lawv. Tab sis muaj ib yam txhab ntxiv, nej tsev neeg tsis yog hauv nej lub cuab xwb, tab sis yog tas txhua tus neeg nyob ncig nej. Lawv yog nej tsev neeg, yog cov uas Huab Tais Tswv Ntuj pub rau nej kom nej tau tshaj lub Moo Zoo rau lawv, tau coj Huab Tais Tswv Ntuj txoj kev nyiam mus txog lawv. Nej hlub lawv, pub rau lawv, ces nej yuav tau txoj sia nyob mus li.
