Hnub tim 28 lub 3 hlis 2025
Hnub Rau, lis piam 3 caij Plaub Caug.
MK 12: 28-34
Kwv tij Hmoob, muaj ib cov Xas Dus Kais tuaj nug Huab Tais Yes Xus txog kev sawv rov los, ces Huab Tais Yes Xus muab cov lus hauv Ntawv los teb ua rau lawv tws lus. Ib tug kws ntawv nyob ntawd pom tias Huab Tais Yes Xus hais tau raug kawg, nws thiag nug saib raws li Huab Tais Yes Xus xav, nyob hauv Huab Tais Tswv Ntuj cov lus qhia mas lo lus twg loj dua. Huab Tais Yes Xus teb tias tag nrho cov lus qhia Tsuas muab xaus rau ob lo lus no xwb, thiab ob lus no loj tshaj. Yog lo lus tias “Nyiam Tswv Ntuj tas siab tas ntes, tas tswv yim, tas yus tus plig” thiab lo lus tias “Nyiam luag tej ib yam li yus rov nyiam yus.”
Kwv tij Hmoob, lub caij Plaub Caug no peb tig rov los saib peb tus kheej, peb puas nyiam Tswv Ntuj tas siab tas ntsws; yam li peb puas mus teev Ntuj, peb puas niaj hnub nyeem Ntawv Ntshiab, peb puas thov Ntuj tsis tseg, peb puas tso siab rau Tswv Ntuj. Peb puas ua li ntawd, los niaj lis piam peb ceeb laj mus teev Ntuj, peb saib kev nrhiav nyiaj kev khwv noj loj dua kev qee sij hawm ib ob teev mus koom lub Txoos txi Ntuj ua Tswv Ntuj tsaug, peb tsis muab siab rau nyeem los xav txog Tswv Ntuj Lo Lus hauv Ntawv Ntshiab, peb nkees thov Ntuj nrog Tswv Ntuj tham.
Peb ntsia peb saib niaj hnub peb puas nyiam luag lwm tus; yam li thov Ntuj rau lawv, pub mov pub cuab tam rau cov neeg tshaib cov neeg txom nyem, hais lus zoo lus mos rau lwm tus, pab ntxiv zog txhawb siab tus neeg qaug zog tag kev cia siab. Peb puas ua li ntawd? Los peb yeej tsis nco txog luag tej, pom luag txom nyem tshaib plab mas tsis cev tes pab, peb kaw tus kheej nyob hauv tsev, qi muag nti tsis pom luag kev txom nyem.
Peb muab xav ces yuav pom tias niaj hnub no peb puas nyiam Huab Tais Tswv Ntuj thiab nyiam luag lwm tus. Nyob zoo.
