ZAJ NYEEM HNUB TIM 27 LUB 5 HLIS 2024
HNUB NCO TXOG LEEJ NTSHIAB AUS NKUS TIS NUS NYOB KHEES TAS NPAWS LIS
COV LUS NYOB HAUV MAS KOS NTAWV MOO ZOO (MK 10: 17-27)
Kwv tij Hmoob sawv daws, peb txhua tus puav leej xwv zoo li tus nplua nuj hauv lub Moo Zoo hnub no. Peb xav tias yuav ua li cas thiaj tau txais txoj sia nyob mus li, peb xav tias yuav ua li cas thiaj mus tau hauv Ntuj lub Ceeb Tsheej, peb xav tias yuav ua li cas thiaj dim ntawm Hmoob cov qub kev cai. Peb muab xav tas, mas peb thiaj txiav tias kawg los ntseeg txog Yes Xus, los ua Ntuj kev cai. Peb cov Hmoob coob tus puav leej xav li ntawd.
Hnub no, tus hluav nplua nuj coj rawv Huab Tais Ntuj 10 Lo Lus, nws kuj tuaj nug Huab Tais Yes Xus tias yuav ua li cas thiaj tau txoj sia nyob mus li, vim nws tsis xav plam hauv lub neej nplua nuj ntawd.
Nws xav tias Huab Tais Yes Xus yuav hais ib co lus xis nws siab. Tab sis Huab Tais Yes Xus cov lus teb tsis zoo li nws lub siab ntshaw. Huab Tais Yes Xus hais rau nws tias “Koj yeej ib txwm yog neeg zoo ua raws Huab Tais Ntuj 10 lo lus qhia tiag, koj tsis tau hla ib nqe li. Tab sis tshuav ib yam, koj muab koj lub cuab tam muag mas, koj muab cov nyiaj ntawd pub rau cov pluag, ces koj los raws kuv.”
Tus nplua nuj hnov cov lus no, nws ua ntsej muag ntshau. Tos nws ntshau zoo li ntawd, tej zaum yog nws lub siab tseem dai dhuam rau nyiaj txiag, los yog tej zaum yog Huab Tais Yes Xus cov lus tsis haum rau nws lub siab ntshaw.
Kwv tij Hmoob, muaj ntau zaus peb xav kom Huab Tais Tswv Ntuj ua raws li peb xav tau, peb xav kom Huab Tais Tswv Ntuj npo peb ntawm peb tej kev ntxhov siab, peb xav kom Huab Tais Tswv Ntuj hais ib lo lus qab zib rau peb kom peb lub siab kaj tuaj. Thaum peb tsis tau raws li lub siab ntshaw, ces peb tsis xav raws Huab Tais Yes Xus, tsis xav ua neeg ntseeg ntxiv. Peb tab tom yuav peb siab, tsis yog qhib siab mloog Huab Tais Tswv Ntuj lus, tsis yog nyiam ua raws Huab Tais Yes Xus cov lus qhia.
Hnub no, peb rov thim los ntsia hauv peb, saib peb puas zoo li tus nplua nuj hauv lub Moo Zoo hnub no, xav tau txoj sia nyob mus li tab sis tsis yeem ua raws li Huab Tais Yes Xus hais.
