ZAJ NYEEM HNUB TIM 27 LUB 2 HLIS 2025
HNUB TSIB, LUB LIS PIAM 7 CAIJ NYOB NRUAB XYOO
NXL 5: 1-8; MK 9: 41-50
Kwv tij Hmoob, Huab Tais Yes Xus hais tias “Leej twg muab ib khob dej rau nej haus vim nej yog Leej Pleev tug, mas tus ntawd yuav txais koob haum”, mas yog Huab Tais Yes Xus tab tom txhib peb sawv daws kom txais cov neeg tuaj vam txog peb. Yog nej nco tau mas peb twb hais tias tus twg txais lwm tus mas tus ntawd yog tus tsob hwb lwm tus, nws yuav yog tus ua thawj nyob hauv Tswv Ntuj lub Ceeb Tsheej. Li ntawd, yog peb mloog Huab Tais Yes Xus mas peb yuav tau zoo siab txais cov neeg tuaj vam txog peb, cov neeg txom nyem, cov neeg thov kev pab ntawm peb. Peb yuav tsum muaj lub siab hlub neeg, muaj lub siab muag, muaj lub siab dav.
Huab Tais Yes Xus hais ntxiv tias “Yog leej twg coj ib tug neeg ntseeg me me no kom ua txhaum, mas cia luag muab lub zeb zom mus dai nws caj dab thiab pov rau hauv dej ntuj.” Thaum Huab Tais Yes Xus hais lo lus no mas yog nws tab tom puag tus me nyuam nyob ntawm cov thwj tim xub ntiag, tab sis Huab Tais Yes Xus lo lus no tsis yog hais txog kev cob ib tug me nyuam kom ua txhaum. Tab sis lub ntsiab yog hais txog kev cob cov neeg tsis paub tab, cov neeg siab huv kom mus ua txhaum; vim cov neeg tsis paub tab los yog siab huv mas thaum luag hais li cas mas lawv yuav li ntawd, ces lawv raug dag raug ntxias yooj yim.
Peb saib peb tej me nyuam ua piv txwv; thaum lawv raug mob qhov twg lawv quaj, peb ua niam ua txiv peb tshuab thiab hais tias “Zoo lawm lauj” mas me nyuam cia li ntsiag thiab ua tus tsis hnov mob tam sid. Los yog peb txib me nyuam ua hauj lwm, peb hais tias “Koj cheb tsev tas mas kuv coj koj mus kav kiab” mas me nyuam rau siab ntso cheb tsev ntag.
Peb saib peb Hmoob lub neej nyob deb kev vam meej ua piv txwv; thaum laus pav coj toob xib tuaj ntxias muag, lawv hais tias “Cov tshuaj no zoo zoo li, koj coj mus tsuag koj cov zaub mas kab tuag tas” ces Hmoob cia li yuav coj mus siv.
Huab Tais Yes Xus hais tias tus neeg twg coj cov neeg tsis paub tab li no mus ua txhaum, mas kom muab lub zeb zom khi nws caj dab ces coj mus pov hauv dej ntuj.
Cov Yus Das lub zeb zom yog tej lub zeb txaug loj loj xws li Hmoob cov zeb zom pob kws thaud uas tsum siv ib los ob leeg sib pab zom. Yog li mas Huab Tais Yes Xus thiaj xav qhia peb tias tus neeg ntxias cov neeg tsis paub tab ua txhaum mas zoo txhob pub nws dim hauv kev tuag yuav zoo dua.
Huab Tais Yes Xus tseem hais tias “Yog koj txhais tes coj koj mus ua txhaum, yog koj txhais taw coj koj mus ua txhaum, yog koj lub qhov muag coj koj mus ua txhaum; mas muab txiav muab kaus pov tseg cia koj tu tes tu taw los yog dig muag zoo mus hauv Tswv Ntuj lub Ceeb Tsheej zoo dua cia koj poob hauv dab phem cov hluav taws.” Lo lus no yog Huab Tais Yes Xus txhib peb kom ua tiag nrauj kev ua txhaum pov tseg.
Huab Tais Yes Xus hais ntxiv tias “Nej cia ntsev nyob hauv nej mog, nej thiaj yuav nrog sawv daws ua neej nyob thaj yeeb” txhais tias peb tsum ua qhov zoo rau sawv daws mus li mas peb thiaj yuav nyob tau nrog lawv yam thaj yeeb.
