ZAJ NYEEM HNUB TIM 27 LUB 10 HLI 2025
HNUB OB LIS PIAM 30 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 13: 10-17)
Kwv tij sawv daws, nyob rau hauv hnub no peb yuav pom tias, Huab Tais Yes Xus tab meeg qhia, tab meeg ua, tsis ntshai txhaum cai rau leej twg. Vim Huab Tais xav qhia txog Tswv Ntuj txoj kev khuv leej neeg, nws xav qhia qhov tseeb qhov yog rau tsoom His Xas Lais, vim lawv yog Tswv Ntuj haiv neeg, lawv tab tom yuam kev, ces Huab Tais thiaj taw ke kom lawv qhov muag kaj, kom lawv pom qhov tseeb, thiab paub txog Tswv Ntuj lub siab hlub neeg. Ces nyob rau hauv zaj no, Lus Kas piav txog Huab Tais tab meeg kho tus neeg mob nyob rau hauv hnub Xas Npas Tos, uas yog hnub caiv, thiab nyob rau hauv ib lub tsev txoos. Cov thawj coj thiab qee leej neeg tsis txaus siab rau Huab Tais Yes Xus cov hauj lwm zoo no, tiam sis, hais tau tias, qhov kawg kuj ua tau raug sawv daws siab kawg, thaum Huab Tais Yes Xus rov nug lawv tias ; “Tas nej sawv daws, nej tsis daws hlua thiab cab nej cov nyuj mus noj zaug nyob rau hnub Xas Npas Tos li lod ? Tus poj niam no, nws yog Has Nplas tsoom xeeb ntxwv, nws raug dab ntxwg nyoog muab nws khi rau hauv kev mob kev ntshaj los tau ntau xyoo lawm, nws tsis tsim nyog daws nws tus mob nyob rau hnub Xas Npas Tos lod? Thaum tsoom sid hnov li ntawd, ua rau lawv muaj kev zoo siab, tab yog qhov Huab Tais Yes Xus ua no, tsis haum txoj cai, tiam sis, kuj haum lawv siab kawg.
Peb yog Yes Xus tsoom thwj tim, mas peb yuav tsum hnov qab cov hauj lwm hlub neeg, vim peb tus Tswv nws yog Tswv hauv txoj kev sib nyiam sib hlub, li ntawd, peb yuav tsum muab kev sib hlub los saib hlob dua lwm yam hauj lwm.
Nyob zoo sawv daws.
