ZAJ NYEEM HNUB TIM 27 LUB 1 HLIS 2025
HNUB NCO TXOG LEEJ NTSHIAB AS NTSES LAS
HN 9: 15, 24-28; MK 3: 22-30
Kwv tij Hmoob, thaum Huab Tais Yes Xus ua hwj huam ntiab dab thiab kho tau cov neeg mob mas ua rau muaj tsoom sid coob coob raws Huab Tais Yes Xus, lawv ntseeg cov lus Huab Tais Yes Xus qhia. Cov thoob xwm thiab cov Fas Lis Xais pom li ntawd mas lawv ntshai. Lawv ntshai tsam tas cov Yus Das tso lawv pov tseg, cov Yus Das tsis mloog lawv ntxiv ces yuav ua rau sawv daws tsis tuaj vam txog lawv. Cov thoob xwm thiab cov Fas Lis Xais ntshai poob hwj chim, ntshai poob koob meej.
Lawv pom li ntawd, mas hnub no lawv thiaj xa ib pab neeg tuaj Yes Lus Xas Les tuaj cuag Huab Tais Yes Xus nyob Nkas Lis Lais, lawv liam tias tos Huab Tais Yes Xus ua hwj huam li ntawd tau mas yog vim nws vam txog dab tuaj pab nws, Yes Xus yog ib tug niag neeg vwm raug dab Npes Ntxes Npus.
Kwv tij, Npes Ntxes Npus yog haiv Fis Lis Tis ib tug txoov dab hu dab thiab coj kab mob tuaj rau neeg lub cev. Yog li mas thaum cov Fas Lis Xais pom Huab Tais Yes Xus nrog cov neeg sau se noj mov ua ke, pom Huab Tais Yes Xus tsis ua kab ke yoo xws li lawv, pom Huab Tais Yes Xus ntiab dab thiab kho tau cov neeg mob; mas lawv hais tias yog Huab Tais Yes Xus raug tus dab Npes Ntxes Npus thiab vam txog tus tuam thawj dab tuaj ntiab cov dab me looj koov neeg lub cev kom muaj mob.
Lawv liam li no kom cov neeg tsis txhob raws thiab vam txog Huab Tais Yes Xus ntxiv.
Huab Tais Yes Xus hlub cov neeg txom nyem tuaj vam txog nws, ces Huab Tais Yes Xus thiaj xav hais ib co lus rau lawv coj mus xav tswv yim. Huab Tais Yes Xus hais tias “Yog ib lub teb chaws rov ua kom nws sib tawg, mas lub teb chaws ntawd nyob tsis ruaj. Yog ib tse neeg rov ua kom nws sib tawg, mas lub tsev ntawd yuav nyob tsis tau. Ua li yog Xas Tas rov sawv tiv Xas Tas, mas nws tawg, ces nws yuav nyob tsis tau, nws kawg yuav piam sij tas.”
Kwv tij Hmoob, Huab Tais Yes Xus cov lus no tseeb kawg nkaus; yog Huab Tais Yes Xus raug dab thiab rov hu txog dab tuaj ntiab dab, mas puas yuav tau? Dab phem yeej tsum yuav nyob dab phem tog, dab phem tsis yuav rov ntaus rog nrog dab phem. Tswv Ntuj kuj yuav tuaj Tswv Ntuj haiv neeg tog, Tswv Ntuj tsis rhuav Tswv Ntuj haiv neeg; tus Tswv Ntuj rhuav mas yog dab phem nyob hauv neeg.
Huab Tais Yes Xus cov lus no tseem muaj ib lub ntsiab tob tob ntuas cov neeg raws nws tias lawv yuav tsum sib npuab siab sib koom ua ib pab kom khov mas lawv thiaj yuav tsis poob rau cov neeg xav rhuav lawv zaj tswv yim. Zaj no kuj zoo qhia rau peb tias peb ua neej nyob mas peb kuj yuav tsis txhob rov ua kom peb sib tawg.
