ZAJ NYEEM HNUB TIM 26 LUB 9 HLI 2024
HNUB NCO TXOG LEEJ NTSHIAB KOS MAS THIAB DAS MIS NOS
COV LUS NYOB HAUV LUS KAS NTAWV MOO ZOO (LK 9: 7-9)
Kwv tij Hmoob sawv daws, thaum cov Hauv Paus Xa Lus tawm mus tshaj lub Moo Zoo raws li Huab Tais Yes Xus xa lawv mus, mas tas lub teb chaws hais txog Yes Xus ntau yam. Tej tus hais tias Huab Tais Yes Xus yog tus Yaj Saub Es Lias, tej tus hais tias yog lwm tus Yaj Saub, tej tus tseem hais tias Huab Tais Yes Xus yog tus Ntxuav Plig Zam sawv rov los.
Kwv tij, lub moo hais txog Huab Tais Yes Xus no ncha mus txog Hes Los pob ntseg, ua rau Hes Los lub siab nyob tsis tus vim tias ua ntej no Hes Los twb hais cov zov keeb mus muab Zam txiav caj dab tuag lawm.
Raws li Ntawv Moo Zoo piav, mas Hes Los hwm Zam Ntxuav Plig tab sis vim nws tau hais rau Hes Los Dias tus ntxhais tuaj seev cev hauv Hes Los hnub tsuj xeeb tias nws thov dab tsi mas Hes Los yuav pub rau. Tus ntxhais hais tias nws thov Zam lub taub hau, ces Hes Los tsis paub yuav ua li cas, nws thiaj tau muab Zam txiav caj dab coj lub taub hau los rau tus ntxhais.
Hes Los yog ib tug neeg lim hiam, tsis kav nyob tob tob hauv nws lub siab mas nws tseem tshuav ib qhov zoo; nyaj nws tu siab rau cov lus nws hais kom muab Zam txiav taub hau, mas thaum nws hnov luag hais tias tej zaum Huab Tais Yes Xus yog Zam Ntxuav Plig sawv rov los, mas nws thiaj ntxhov siab, nws xav pom saib Huab Tais Yes Xus puas yuav yog Zam tiag, los Huab Tais Yes Xus yog lwm tus neeg ntxim hwm xws li nws hwm Zam.
Kwv tij, peb kuj tu siab rau qhov tias thaum kawg, Hes Los tau ntsib Huab Tais Yes Xus tiag, tab sis nws tsis paub Huab Tais Yes Xus yog leej twg. Hes Los tsuas hais tias Huab Tais Yes Xus tsuas yog ib tug neeg vwm no xwb.
Hnub no peb rov los mloog lub suab hu tob tob hauv peb nruab siab saib peb puas paub tias Huab Tais Yes Xus yog leej twg, peb puas nrhiav kom tau ntsib Huab Tais Yes Xus.
Kwv tij, Huab Tais Yes Xus yeej niaj hnub nyob nrog peb, nyob ib puag ncig ntawm peb. Thov kom peb txawj mloog lub suab nrov hauv nrab siab hais lus rau peb tias tus neeg txom nyem peb ntsib hnub no yog Huab Tais Yes Xus, thov kom peb txawj qhib qhov muag ntsia tus neeg pluag peb pom hnub no tias nws yog Huab Tais Yes Xus.
