ZAJ NYEEM HNUB TIM 26 LUB 5 HLIS 2025
HNUB NCO TXOG LEEJ NTSHIAB FIS LIS POS NES LIS
COV LUS NYOB HAUV ZAM NTAWV MOO ZOO (Z 15: 26-16: 4)
Kwv tij Hmoob, Huab Tais Yes Xus hais qhia cov thwj tim tias yog nws raug hiam mas cov thwj tim kuj yuav raug hiam li nws thiab. Huab Tais Yes Xus xav qhia lawv kom paub vim tsam txog thaum lawv raug hiam ces lawv yuav xav tias ua cas lawv thiaj yeem raug luag hiam, ces hnub no Huab Tais Yes Xus thiaj hais qhia rau lawv. Yog lawv paub li no lawm, hnub Lawv raug hiam mas lawv thiaj yuav nco tau tias thaud Huab Tais Yes Xus twb xub hais rau lawv lawm.
Niaj hnub no peb ntsib kev txom nyem, peb raug luag lwm tus ua phem ua tsis ncaj, mas peb yuav zoo siab vim Huab Tais Yes Xus twb xub qhia peb thiab raug ua ntej peb lawm tab sis qhov Huab Tais Yes Xus tau txais tom qab tej ntawd dhau mas yog kev zoo siab, ces peb lub siab thiaj yuav kaj.
Yog peb nyeem nyob hauv cov Hauv Paus Xa Lus cov Hauj Lwm mas peb yuav pom tias tom qab Huab Tais Yes Xus mus saum ntuj tas, cov thwj tim raug hiam tiag tab sis lawv zoo siab thiab lawv ua Tswv Ntuj tsaug rau qhov Tswv Ntuj cia lawv raug hiam kom tau ua tim khawv txog Huab Tais Yes Xus.
Cov neeg ntseeg nyob Yes Lus Xas Les raug cov Thawj Leej Choj thiab cov txwj laus hiam mas lawv thiaj khiav mus nyob thoob lub Los Mas tuam teb ua rau lub Moo Zoo ri mus txhua qhov chaw. Yog thaum cov ntseeg raug hiam, lawv thim kev ntseeg mas ntshai niaj hnub no txoj kev ntseeg txog Yes Xus twb tuag lawm.
Nyob hauv cov teb chaws tseem hwv hiam lub Koom Txoos, mas muaj ntau lub teb chaws txoj kev ntseeg tsuag, tab sis muaj ntau lub mas txoj kev ntseeg yim muaj zog thiab huam vam mus sai.
Kwv tij, peb hais los no yog xav hais tias txawm li cas los thaum peb ntsib kev txom nyem, thaum peb raug tsim txom, mas kom peb nco tias Huab Tais Yes Xus twb xub raug ua ntej thiab twb xub hais txog tas lawm.
Peb pom tias paj tshab cov neeg tsis kam thim lawv txoj kev ntseeg mus txog qhov kawg, lawv tuag ntawd mas lawv tau txais txoj sia nyob mus li pem Tswv Ntuj lub Ceeb Tsheej lawm. Peb pom lawv lub cev tuag, tab sis peb ntseeg tias lawv txoj sia tsis tuag.
Hnub no, peb zoo siab rau qhov tias nyob hauv cov teb chaws peb nyob, tseem hwv los nom tswv, cov neeg koom zos nrog peb, lawv tsis liam dab tsi rau peb kev ntseeg, lawv tsis hiam peb; tab sis tseem tshuav ntau qhov chaw hauv lub ntiaj tAUb no uas cov neeg ntseeg tseem raug tsim txog, peb yuav thov Ntuj rau lawv. Tsis tas li, peb kuj pom tias nyob ntau thaj tsam muaj kev sib ntaus sib tua, ua rau tsoom pej xeem ntsib xwv txheej kev txom nyem; peb kuj thov Ntuj rau lawv, thov Tswv Ntuj xa Leej Nplij Neeg tuaj pab nplij lawv siab kom rov muaj zog; thov Tswv Ntuj xa Leej Nplij Neeg tuaj tshoj cov nom tswv kom lawv ras pom tias lawv kev siv riam phom sib tua tsis muaj qab hau dab tsi rau lub ntiaj teb, kawg yog kev tuav tes tsim kev thaj yeeb xwb thiaj yuav ua tau kom lub teb chaws vam meej sawv daws muaj tsim. Nyob zoo sawv daws.
