ZAJ NYEEM HNUB TIM 26 LUB 2 HLIS 2025
HNUB PLAUB, LUB LIS PIAM 7 CAIJ NYOB NRUAB XYOO
NXL 4: 11-19; MK 9: 38-40
Kwv tij Hmoob, hnub no peb hnov Huab Tais Yes Xus tus thwj tim Zam hais rau Huab Tais Yes Xus tias lawv pom tej tus neeg tuav txog Yes Xus lub npe los ntiab dab, lawv xav txwv tsis pub nws ua li ntawd. Puas tsim nyog cia cov neeg ntawd ua mus ntxiv los yuav txwv tsis pub ua. Ces Huab Tais Yes Xus teb rau Zam tias cia cov neeg ntawd lawv ua lawv yog tias lawv ua qhov zoo thiab tsis hais lus phem txog Yes Xus.
Kwv tij, nyob rau lub zim txwv no txoj kev ntseeg txog Yes Xus ri mus hauv txhua haiv neeg thiab kuj ncau mus ua ntau lub Koom Txoos, ces peb pom tias muaj ib txhia tuav txog Huab Tais Yes Xus lub npe los ua hwj huam; yam li ntiab dab thiab kho tej tus neeg mob, los yog muaj tej tus kuj tseem tuav txog Huab Tais Yes Xus lub npe los tshaj Ntuj Lus.
Thaum peb pom mas peb yuav ua xyav xyav tias qhov ntawd puas muaj tseeb, qhov ntawd puas yog tuaj ntawm Tswv Ntuj tuaj los yog tuaj ntawm dab ntxias neeg tuaj. Peb tsis paub yog tias peb tsis pom lawv cov txiv.
Hnub no Huab Tais Yes Xus hais rau Zam thiab cov thwj tim tias “Leej twg tsis tiv peb mas nws tuaj peb tog.”
Kwv tij, yog li mas niaj hnub no lub Koom Txoos thiaj tsis hais tias cov hu txog Huab Tais Yes Xus lub npe los ua hwj huam mas lawv yog cov neeg dag, lub Koom Txoos tsuas ntuas sawv daws kom xyuam xim saib kom zoo thiab ruaj nreb rau qhov yus ntseeg. Piv li peb ua tus neeg ntseeg nyob hauv lub Koom Txoos Kav Tos Liv mas peb kuj yuav ntseeg raws li lub Koom Txoos qhia, tsis yog pomlwm lub Koom Txoos ua tau hwj huam ces txawm tig hlo mus raws mus npuab luag. Cov ntseeg nyob hauv lwm lub Koom Txoos kuj yuav ua tib yam li ntawd, nyias yuav ruaj nreb rau nyias lub Koom Txoos.
Hais li no tsis yog kom ob tug kwv tij hauv ob lub Koom Txoos muaj lus sib cav, muaj kev sib twv; tab sis yog kom sawv daws ua siab dav sib hwm nyob hauv Huab Tais Yes Xus.
