ZAJ NYEEM HNUB TIM 25 LUB 8 HLI 2025
HNUB OB, LIS PIAM 20 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 23: 13, 15-22)
Kwv tij sawv daws, kev ua ib tug neeg ntseeg Ntuj, tsis yog yus ntseeg ntawm lub ncauj xwb, tiam sis, yus yuav tsum ntseeg tas nrho hauv yus lub siab lub ntsws tuaj mus, tsis tas li ntawd, yus yuav tsum ua raws li cov lus qhia thiab.
Huab Tais Yes Xus tsawm cov Kwv Ntawv Ntshiab thiab cov Fas Lis Xais yog neeg zoo saum daim tawv xwb, yog vim lawv lub ncauj txawj qhia kom luag lwm tus txhob ua dhau txoj cai, tiam sis, lawv tsis txawj hlub luag tej, lawv quab yuam cov neeg pluag thiab cov txom nyem. Lawv coj tsis ncaj, tseem yuam kom tsoom pej xeem ua raws li lawv hais. Yog vim li no Huab Tais Yes Xus thiaj nqe los qhia qhov tseeb, thiab coj txoj kev ncaj rau peb taug. Yog tsis li ntawd, ntshai neeg yuav yuam kev tag, thiab nrhiav tsis tau kev rov mus cuag Huab Tais Tswv Ntuj, vim cov thawj coj, coj tsis ncaj, qhia tsis yog. Xws li Huab Tais Yes Xus lo lus tias “Yog cia tus dig muag coj tus dig muag kev, mas ntshe ob leeg yuav mus poob tsag tas huv si.”
Yog li ntawd, kwv tij sawv daws, ntau zaus, peb yuav tsum xyuam xim, kev ntaus nqi hauv Tswv Ntuj cov lus qhia, los yog kev nthuav cov lus hauv phau Ntawv Ntshiab yuav tsum vam txog Leej Ntuj Plig Ntshiab coj peb kev thiab qhuab qhia peb, mas peb thiaj tsis yuam kev.
Nyob zoo.
