Hnub tim 25 lub 3 hlis 2025
Hnub ua hmoov tus Tshiab xa xov tuaj rau Mab Liab.
LK 1:16-28
Kwv tij Hmoob sawv daws, hnub ua hmoov tus Tshiab xa xov tuaj rau Mab Liab yog hnub tseem ceeb nyob hauv lub Koom Txoos vim tias hnub no Tswv Ntuj kom nws tus Tshiab xa ib lub moo zoo tuaj rau Mab Liab. Qhov no yog lub hauv paus tshiab chiv ntiaj teb neeg lub keeb. Peb pom tias tus Tshiab xa lub moo tuaj rau ib tug ntxhais hluas nyob hauv lub zos me me Nas Xas Les tias Tswv Ntuj yuav xa Leej Tub los xeeb nyob hauv tus poj niam no lub cev kom tau cawm ntiaj teb neeg, saib tus poj niam no puas nyeem.
Mab Liab mloog thiab tso siab ua raws li Tswv Ntuj hais, ces txoj kev cawm thiaj xeeb tau. Niaj hnub no peb kuj pom tias muaj ntau Leej neeg ua qhov zoo kom tau pab coob tus neeg dim hauv kev txom nyem. Tswv Ntuj ua hauj lwm li ntawd.
Kwv tij, ob txhiab tawm xyoo dhau los Tswv Ntuj xaiv Mab Liab ua tus xeeb ntiaj teb neeg tus cawm seej, niaj hnub no Tswv Ntuj xaiv peb ua tus tsim ntiaj teb neeg kev sib nyiam sib hlub. Li ntawd, nyob ntawm peb saib puas yuav ua xws li Mab Liab thiab hais rau Tswv Ntuj tias “Kuv yog koj tus tub txib los ntxhais txib, kuv xav kom muaj raws li koj hais.” Nyob zoo.
