HNUB TIM 25 LUB 11 HLIS; HNUB NCO TXOG LEEJ NTSHIAB KAS THAS LIS NYOB AS LES XAS NRIAS
COV LUS NYOB HAUV LUS KAS NTAWV MOO ZOO (LK 21: 1-4)
Cov kwv tij Hmoob, nyob hauv lub Tuam Tsev Teev Ntuj yuav muaj 13 lub txhab ceev nyiaj txawb hauv cov mom kaum lub Tuam Tsev Teev Ntuj cia rau sawv daws tau tso cov nyiaj pub rau lub Tuam Tsev Teev Ntuj. Cov neeg tuaj hauv lub Tuam Tsev Teev Ntuj, sawv daws yuav pub nyiaj rau hauv cov txhab ceev nyiaj ntawd.
Huab Tais Yes Xus thiab nws cov thwj tim nyob ntawm ib cag, lawv ntsia cov neeg mus mus los los, lawv pom cov neeg tso nyiaj rau hauv cov txhab ceev nyiaj; tus muaj ntau muab ntau, tus muaj tsawg muab tsawg. Tej zaum cov thwj tim yuav hais lus qhuas cov neeg nplua nuj uas pub nyiaj ntau rau hauv lub txhab ceev nyiaj. Lawv tsis nco pom cov pluag. Thaum ntawd, muaj ib tug poj ntsuam pluag txom nyem muab 2 lub txiaj tso rau hauv. Huab Tais Yes Xus xav ntuas cov thwj tim kom txhob saib neeg sab nraud, tab sis tsum saib hauv neeg nruab siab, ces Huab Tais Yes Xus hais rau cov thwj tim tias tus poj ntsuam ntawd tau tso nyiaj rau hauv lub txhab ceev nyiaj ntaus dua sawv daws.
Kwv tij Hmoob, yog peb nrog cov thwj tim sawv ua ke ntawd, mas ntshai peb yuav xav tias ua cas tus neeg tso 2 lub txiaj xwb thiaj yog tus muab ntau dua cov tso 10 los 100 lub txiaj?
Yog peb ntsia sab nraud uas neeg qhov muag pom, mas peb yuav xav li ntawd tiag, tab sis Huab Tais Yes Xus saib hauv neeg nruab siab, Huab Tais Yes Xus paub tias tus poj ntsuam ntawd muab tas nrho nws lub cuab tam los tso rau hauv lub txhab ceev nyiaj, tsis zoo li cov neeg nplua nuj uas lawv rho cov nyaj seem los pub rau hauv lub txhab ceev nyiaj.
Yog peb ua tib zoo xav ntxiv, peb yuav pom tias tos tus poj ntsuam pluag ntawd muab tas nws lub cuab tam pub rau lub Tuam Tsev Teev Ntuj, mas vim nws txom nyem dhau, nws tsis muaj txiv los tej me nyuam ua chaw vam khom, qhov nws vam khom txog tsuas yog Tswv Ntuj tus nyob hauv lub Tuam Tsev Teev Ntuj xwb. Nws thiaj yeem pub tas nrho nws ob lub txiaj uas yog tag nrho nws lub cuab tam rau Tswv Ntuj.
Kwv tij, nyob hauv peb mas peb puas ua xws li tus poj ntsuam no; peb puas cev tag nrho peb lub neej, peb txoj sia rau Tswv Ntuj?
Yog hais ntawm lub ncauj mas yooj yim kawg. Peb txhua tus yeej hais tau tias ‘kuv thov cev txhua yam pub rau Tswv Ntuj.’ Tab sis thaum txog kiag lub sij hawm mas sawv daws yuav ua xyem xyav, sawv daws yuav muaj chaw xyeej.
Kom peb nco tias muaj ib zaug Huab Tais Yes Xus txhib kom ob tug thwj tim raws Huab Tais Yes Xus mus, ib tug hais tias “Thov koj cia kuv mus faus kuv txiv tso”, lwm tus hais tias “Huab Tais, kuv yuav raws koj mus, tab sis thov koj cia kuv mus hais ib lo lus ncaim tseg rau kuv tsev neeg tso.” Los yog zoo li thaum cov thwj tim hais tias lawv yuav nrog Huab Tais Yes Xus mus tuag ua ke, tab sis thaum cov neeg tuaj ntes Huab Tais Yes Xus mas lawv tso tes khiav tas.
Kwv tij Hmoob, peb thov Tswv Ntuj nrog nraim peb, kom peb txawj tso siab rau Huab Tais Yes Xus, kom peb vam khom txog Huab Tais Yes Xus mus li, mas peb thiaj yuav qee tau tag nrho peb lub cuab tam pub rau Tswv Ntuj. Nyob zoo sawv daws.
