ZAJ NYEEM HNUB TIM 23 LUB 5 HLIS 2025
HNUB RAU, LIS PIAM 5 CAIJ HLA
COV LUS NYOB HAUV ZAM NTAWV MOO ZOO (Z 15: 12-17)
Cov kwv tij Hmoob, hnub no peb rov hnov Huab Tais Yes Xus hais txog kev sis nyiam sis hlub ntxiv. Huab Tais Yes Xus hais tias “Kuv lo lus qhia yog lo lus no; nej sis nyiam sis hlub zoo li kuv tau nyiam tau hnub nej.”
Thaum peb nyiam tus neeg twg mas peb nyob ruaj hauv nws, thaum tus twg nyiam peb mas nws kuj nyob ruaj hauv peb. Yog li mas thaum peb sis nyiam sis hlub mas yog peb ib tug nyob ruaj hauv ib tug, ces peb thiaj tsis sib tawg sib cais.
Kwv tij Hmoob, txhua tus neeg nyiam kev thaj yeeb sib haum xeeb mas puav leej qhia kom sawv daws ua neej nyob sis nyiam sis hlub tab sis muaj ib yam Huab Tais Yes Xus qhia txawv luag tej; yog qhov tias tus muaj txoj kev nyiam loj tshaj yog tus yeem muab nws txoj sia rau nws cov phooj ywg. Huab Tais Yes Xus tsis yog lam hais lo lus kom zoo mloog tab sis Huab Tais Yes Xus ua raws li nws tau hais tiag; peb pom nyob saum tus Ntoo Cuam tias Huab Tais Yes Xus nyiam ntiaj teb neeg tas npaud mas nws thiaj yeem tuag saum txom nyem kom tau cawm tas sawv daws. Huab Tais Yes Xus muab sawv daws saib ua nws cov phooj ywg, txawm tias lawv ib txhia yuav tso nws pov tseg, ib txhia thuam nws, ib txhia liam lub txim rau nws, ib txia raus tes muab nws tua.
Peb pom li no lawm, peb puas xav nyiam Huab Tais Yes Xus ib yam li nws tau nyiam peb. Raws li xav mas tsim nyog peb yuav nyiam Huab Tais Yes Xus tas siab tas ntsws tiag tiag, tsis xav ua kom nws tu siab los khuv xim tias tau muab tas nws txoj sia los nyiam peb. Tab sis peb kuj yuav lees tias peb yog neeg tsis muaj zog, mas ntau zaus peb tsis nco txog Huab Tais Yes Xus tias Huab Tais Yes Xus saib peb yog nws phooj ywg, ntau zaus peb cia kev phem kev tsis zoo tuaj plooj peb qhov muag kom txhob ntsia pom Huab Tais Yes Xus tuag txhiv peb, ntau zaus peb cia kev txhaum tuaj tsuas peb lub tswv yim ces peb lub siab xav tsis txog Huab Tais Yes Xus tias Huab Tais Yes Xus xaiv peb los ua nws tug.
Kwv tij, Huab Tais Yes Xus nyiam peb tag, nws xaiv peb thiaj xa peb mus tshaj txoj kev nyiam rau lub ntiaj teb neeg paub, kom peb txi txiv. Peb cov txiv yog kev sis nyiam sis hlub. Yog peb sis nyiam sis hlub mas peb tuav txog Huab Tais Yes Xus lub npe thov dab tsi ntawm Tswv Ntuj mas Tswv Ntuj yuav muab rau peb.
Huab Tais Yes Xus tseem hais rau cov thwj tim tias “Luag tej yuav paub tias nej yog kuv cov thwj tim los tsis yog, mas yog luag saib qhov tias nej puas sis nyiam sis hlub.” Li ntawd, kwv tij, peb kav tsij sib nyiam raws li Huab Tais Yes Xus tau nyiam peb txog qhov nws muab tas nws txoj sia rau peb. Peb yuav thov Leej Ntuj Plig Ntshiab pab peb kom ntsia pom txog qhov no thiab kom peb txawj nyiam cov neeg nyob ncig peb, kom nyob hauv peb ib tsoom neeg ntseeg tsuas muaj kev sis nyiam sis hlub mus li tsis txhob ploj. Nyob zoo sawv daws.
