ZAJ NYEEM HNUB TIM 23 LUB 5 HLIS 2024
HNUB TSIB LUB LIS PIAM 7 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 9: 41-50)
Kwv tij Hmoob sawv daws, thaum peb hnov Huab Tais Yes Xus cov lus hauv hnub no, mas zoo li yog ib co lus tawv kawg nkaus. “Koj sab tes xis coj koj mus ua txhaum, mas kav tsij muab txiav pov tseg. Koj txhais taw coj koj mus ua txhaum, mas muab txiav kiag pov tseg. Koj lub qhov muag coj koj mus ua txhaum, muab dawj hlo pov tseg.”
Peb tsum tau ua cuag no lod, peb thiaj yuav tau mus hauv Tswv Ntuj lub Ceeb Tsheej?
Kwv tij Hmoob, peb yeej yuav tau ua cuag ntawd tiag. Tab sis Huab Tais Yes Xus cov lus no tsis yog kom peb muab tes txiav, muab taw txiav, los yog muab qhov muag dawj tawm. Huab Tais Yes Xus hais ua paj lug txog lub siab ntshaw ua phem, lub tswv yim xav qhov tsis zoo, tej hauj lwm tsis xis Tswv Ntuj siab.
Huab Tais Yes Xus qhia kom peb nrauj tej ntawd pov tseg; hle lub siab phem pov tseg tig los hnav lub siab tshiab, ntxuav lub tswv yim tsis zoo pov tseg tiag los yuav lub tswv yim tshiab, tso tej hauj lwm tsis haum Tswv Ntuj pov tseg tig los ua cov hauj lwm sis nyiam sis hlub.
Cov kwv tij Hmoob, thaum peb nrauj tej yam tsis zoo pov tseg lawm, Huab Tais Yes Xus xav kom peb txuag thiab tu yam tshiab nyob hauv peb kom txhob tsuag mus. Huab Tais Yes Xus muab piv rau cov ntsev.
Nyob hauv His Xas Lais teb, lawv muaj ntsev ntau, lawv siv ntsev los las tej nqaij kom txhob lwj, lawv siv cov ntsev los pos tej dej kom txias mus li. Tab sis thaum twg cov ntsev ntawd tsuag lawm, yuav coj los las nqaij tsis tau, coj los pos tej dej kom nyob txias zias tsis tau. Cov ntsev tsuag tsis muaj qab hau ntxiv.
Li ntawd, peb yuav tau txuag qhov zoo hauv peb kom qab ntsev mus li mog.
