Zaj nyeem hnub tim 22 lub 4 hlis 2026
Hnub Plaub, Lis Piam 3 caij Hla
Cov lus nyob hauv Zam Ntawv Moo Zoo (Z 6: 35-40)
Kwv tij sawv daws, peb txoj kev ntseeg Ntuj yog qhov yuav tsum muaj txoj kev ntseeg ua ntej, txoj kev ntseeg uas muaj qhov tseeb nyob rau hauv. Qhov tseeb ntawd yuav tsum muaj hauv paus hauv ntsis, thiab tseem muaj tej yam tob dua qhov neeg lub tswv yim yuav ntsuas txog. Ntawv Moo Zoo hnub no, Huab Tais Yes Xus xav kom peb ntseeg txog nws, thiab ntseeg txog nws cov lus qhia, uas yog hais txog Leej Txiv Tswv Ntuj thiab Ntuj Ceeb Tsheej. Peb tsoom ntseeg peb ntseeg tias, muaj Tswv Ntuj uas nws xub nyob ua ntej yuav muaj lub ntuj lub teb tshwm sim tuaj. Tswv Ntuj nyiam lub qab ntuj neeg, nws nyiam tib neeg, nws xav kom tib neeg muaj txoj sia nyob mus li xws li nws. Huab Tais Yes Xus tseem hais txog kev sawv rov los. Uas hais txog txoj sia nyob mus li, nyob saum ntuj ceeb tsheej, uas yuav tsum pib tshwj sim tuaj nyob rau ntiaj teb no tso, peb tso siab tias, peb txoj sia yuav tsis muaj caij kawg, txoj kev tuag tsuas yog lub rooj vag rau peb mus cuag Tswv Ntuj txoj sia nyob mus li xwb. Txoj kev ntseeg thiab tso siab rau Huab Tais Yes Xus tas siab nrho, ntseeg txog txhua lo lus uas Huab Tais Yes Xus tau hais, kuj yog ib lub rooj vag rau peb chaws mus hauv Tswv Ntuj lub Ceeb Tsheej thiab.
Nyob zoo sawv daws.
