ZAJ NYEEM HNUB TIM 22 LUB 3 HLIS 2025
HNUB XYA, LIS PIAM 2 CAIJ PLAUB CAUG
(MIK 7:14-15, 18-20; LK 15:1-3, 11-32)
Kwv tij Hmoob, hnub no peb rov hnov Huab Tais Yes Xus hais ib zag paj lug dua; yog zaj hais txog tus tub loj leeb rov los tsev. Zaj no qhia tau ntau yam rau peb, tsis hais leej txiv tus yam ntxwv, tus tub loj leeb tus yam ntxwv, los tus tij laug tus yam ntxwv. Nyob ntawm saib peb yuav hais txog dab tsi.
Huab Tais Yes Xus hais tias tus tub ntxawg xav tau lub cuab tam feem yog nws tug, ces nws hais kom leej txiv muab rau nws; yam li nws thov kom leej txiv muab cov nyiaj uas yog nws tug rau nws, nws yuav mus ua nws lub neej. Tus tub thov li no vim nws tsis xav vam txog nws txiv lawm, nws xav mus ua lub neej tshiab tsis tas yuav muaj nws txiv nyob pab nws.
Kom peb to taub tias qhov tus tub no ua thiab qhov peb ib txhia thov niam txiv li nyiaj txiag mus tsa peb lub neej mas sib txawv, vim tias raws li cov Yus Das kev cai, mas lawv yuav faib cuab tam thaum leej txiv tuag tas lawm xwb. Yog li mas thaum tus tub thov faib li no thiaj yog hais tau tias nws txiav kev txiv tub nrog nws txiv. Cov Yus Das saib yog kev txhaum. Nyob hauv Hmoob kev cai, tus twg tso niam txiv pov tseg, mas sawv daws yeej saib nws yog neeg phem neeg tsis zoo ib yam.
Kwv tij Hmoob, nyob hauv peb txoj kev ntseeg, peb saib Tswv Ntuj yog peb Txiv; thaum peb nrauj Tswv Ntuj, peb tso Tswv Ntuj tseg mus khaub zig lwm yam, thaum ntawd yog peb tau ua txhaum.
Huab Tais Yes Xus piav zaj paj lug ntxiv tias tus tub no khiav mus ib lub teb chaws dwb. Nws muab lub cuab tam phob tas, ces nws mus ua luag qhev zov npua. Nws tshaib plab heev, nws ntshaw noj npua cov qhauv tab sis tsis muaj neeg pub rau nws noj. Thaum no nws mam ras tau tias nyob hauv nws txiv tsev, cov tub zog tau noj seem noj so, ces nws tu siab, nws xav los mus cuag nws txiv thiab thov txhaum ntawm nws txiv. Nws xav tau li ntawd, nws rov los thov txhaum leej txiv thiab thov ua nws txiv ib tug tub zog. Tab sis leej txiv nyiam nws tus tub, ces leej txiv rov tsa tus tub ua nws me nyuam li yav tas los.
Kwv tij Hmoob, Huab Tais Yes Xus hais zaj no yog nws xav ntuas peb kom ras tau tias peb muaj Tswv Ntuj ua peb Txiv, ntau zaus peb tso Tswv Ntuj pov tseg, tab sis yog peb xav tau, peb tu siab rau peb qhov txhaum ces peb los thov txhaum ntawm Tswv Ntuj mas Tswv Ntuj zam rau peb.
Ntawm tus tub hlob, thaum nws paub tias leej txiv txais nws tus kwv ros los ua me nyuam nyob hauv tsev, mas nws npau taws rau leej txiv thiab tus kwv. Tos nws npau taws rau leej txiv vim tias nws pom leej txiv hlub tus kwv ces leej txiv zam rau nws tus kwv. Nws npau taws rau tus kwv vim tias nws tsis muaj siab hlub tus kwv ces nws tsis saib tus kwv yog nws tseem kwv, nws hu tus kwv ua “Koj niag tub ntawd.”
Kwv tij Hmoob sawv daws, Huab Tais Yes Xus hais zaj no yog hais los ntsw cov Fas Lis Xais thiab cov Kws Ntawv Ntshiab tsis txawj hlub cov neeg txhaum. Lawv saib tias lawv yog neeg zoo dua luag, ces lawv ntxub cov neeg tsis paub dab tsi. Lawv zoo li tus tub hlob tsis hlub nws tus kwv. Lawv coj raws txoj cai kom tau txais paj tshab ntawm Tswv Ntuj xwb.
Kwv tij, hnub no peb yuav kawm ntawm ob tug tub no. Peb ua txhaum thaum twg, peb rov los nrhiav Tswv Ntuj, los thov Tswv Ntuj zam txhaum rau peb. Peb ntseeg Ntuj tsis yog kom tau paj tshab tab sis peb ntseeg Ntuj kom tau ua Tswv Ntuj me nyuam, ces peb saib sawv daws yog peb cov kwv cov muam, yog peb cov nus cov viv ncaus, peb nyiam thiab hlub lawv ib yam li peb Txiv nyiam thiab hlub peb. Peb zoo siab thaum peb pom luag tej tig los yuav siab tshiab. Nyob zoo sawv daws.
