ZAJ NYEEM HNUB TIM 21 LUB 3 HLIS 2025
HNUB RAU, LIS PIAM 2 CAIJ PLAUB CAUG
(HP 37:3-4, 12-13, 17-28; MT 21:33-46)
Kwv tij Hmoob, hnub no Huab Tais Yes Xus hais ib zag paj lug txog nws thiab cov Thawj Leej Choj Yus Das. Huab Tais Yes Xus muab nws piv rau tus tswv vaj txiv cawv tus tub, thiab muab cov Thawj Leej Choj piv rau cov neeg zov lub vaj txiv cawv.
Yog peb saib hauv His Xas Lais liv xwm mas pom tias thaum ub Tswv Ntuj xa ntau tus Yaj Saub tuaj ntuas cov His Xas Lais kom mloog Tswv Ntuj tab sis cov vaj thiab cov nom tswv His Xas Lais tsis yuav cov Yaj Saub, lawv tseem muab cov Yaj Saub tua pov tseg thiab. Yog li tus sau tsab ntawv xa mus rau cov Hes Nplaws thiaj hais tias “Puag thaum ub Tswv Ntuj kom cov Yaj Saub siv ntau txoj kev los cev nws cov lus rau peb cov yawg koob. Lub zim txwv no txog lub zwj ceeb kawg lawm, Tswv Ntuj thiaj tso nws Leej Tub tuaj cev nws cov lus rau peb.”
Kwv tij, Huab Tais Yes Xus hais zaj paj lug tas, nws nug tsoom sid tias “Raws li nej xav, thaum tus tswv teb txiv cawv tuaj txog, nws yuav ua dab tsi rau cov zov teb?” Sawv daws teb tias “Tus tswv teb txiv cawv yuav ua kom cov zov teb siab phem ntawd tuag txom nyem ntsuav, ces nws yuav ntiav lwm cov neeg zov nws daim teb.”
Yog kawg, kwv tij Hmoob. Tsoom sid teb li ntawd mas raug kawg. Cov Thawj Leej Choj thiab cov Txwj Laus ntes Huab Tais Yes Xus mus ntsia tuag saum Ntoo Cuam, ces zim txwv no cov Thawj Leej Choj thiab cov Txwj Laus Yus Das thiaj tsis yog cov zov Huab Tais Yes Xus lub Koom Txoos ntxiv.
Kwv tij, yog peb txhob muab piv rau cov Yus Das, tab sis yog peb muab piv rau peb ntiag tug kiag ne, yuav zoo li cas?
Yog tias lub Moo Zoo yog daim teb txiv cawv, peb sawv daws yog cov tub zog zov teb, mas peb puas yuav ua xws li cov zov teb hauv zaj paj lug hnub no.
Lawv hais tias “Thaum txog caij txiv cawv siav, cov zov teb yuav xa cov txiv rau tus tswv.” Lo lus no kuj yog txhib peb tias txog caij mas peb kuj yuav xa lub Moo Zoo cov txiv mus rau Tswv Ntuj thiab. Tej zaum Tswv Ntuj yuav txib lwm tus tuaj cuag peb, hais rau peb tias “Kuv tuaj nqa cov txiv koj txi tau.”
Yog li cov txiv txi ntawm lub Moo Zoo tuaj yog dab tsi? Yog kev ntseeg txog Yes Xus. Yog peb ntseeg txog Yes Xus mas peb yuav tso siab rau Huab Tais Yes Xus thiab mloog Huab Tais Yes Xus cov lus qhia; yam li Huab Tais Yes Xus qhia kom peb nyiam Tswv Ntuj thiab hlub luag tej. Li ntawd, cov txiv peb yuav cev rau Tswv Ntuj thiaj yog peb cov hauj lwm teev tib tug Tswv Ntuj, peb tsis muab siab mus npuab mus vam khom txog cov dab los tej yam hwj huam yees ntxwv tuaj ntawm dab tuaj, peb yuav nyiam thiab hlub cov neeg nyob ib puag ncig peb.
Cov neeg Tswv ntuj xa tuaj nqa cov txiv ntawm peb mas tej zaus yuav yog cov Txiv Plig, peb cov kwv tij hauv txoj kev ntseeg, cov kwv tij tseem teev dab qhuas, los cov txom nyem. Hais tau tias yog txhua tus neeg peb tau ntsib nyob hauv peb lub neej. Tswv Ntuj xa lawv tuaj cuag peb, kom peb tau pub txoj kev nyiam rau lawv, kom peb tau hlub lawv, kom peb tsom txog peb lub siab ntseeg rau lawv pom.
Li ntawd mas kwv tij Hmoob, niaj hnub peb txhob ntiab cov neeg peb ntsib kom lawv mus tes qhuav, peb txhob hais lus phem lus dab tuag rau cov neeg nrog peb txuas lus, peb ua zoo ua ncaj rau sawv daws, thiab peb qhib siab txais Huab Tais Yes Xus los nyob hauv peb lub neej mog. Nyob zoo sawv daws.
