ZAJ NYEEM HNUB TIM 21 LUB 10 HLI 2025
HNUB PEB LIS PIAM 29 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 12: 35-38)
Kwv tij sawv daws, Huab Tais Yes Xus txhib peb siab tas zog tias, tus uas los raws Yes Xus nws yuav tsum nco ntsoov tias, nws yuav tau ntsib Huab Tais Yes Xus ua tus txiav txim rau peb neeg sawv daws, li ntawd, nws yuav tsum npaj kom txhij tos. Huab Tais paub zoo tias, nyob rau hauv peb kev ua neej, peb lub siab muag, peb qaug rau txoj kev phem yooj yim. Huab Tais thiaj li txhib peb tas zog, vim nws txhawj peb, nws xav kom peb ua lub neej nyob rau hauv Tswv Ntuj lub txiaj ntsim tas mus li, peb thiaj tsis poob rau hauv txoj kev ntxias, peb yuav tsis txhob tso peb lub siab ywj fab ywj fwj, peb txhob tsaug zog hauv txoj kev ua txhaum, peb yuav tsum npaj txhij tos Huab Tais yuav tuaj tas mus li, zoo yam li tus tub txib tos nws tus tswv rov los. Pab tsoom ntseeg, mas peb paub zoo tias, qhov peb yuav tau txais kev dim ntawd, yog nyob rau hauv peb cov hauj lwm thaum tseem ua neej nyob ntiaj teb no, li ntawd peb rov nug peb saib, thaum tso lub ntiaj teb no tseg lawm, peb puas xav mus nrog Tswv Ntuj nyob los tsis xav? peb yuav tsum nug peb kom meej meej, peb thiaj li paub npaj siab.
Nyob zoo sawv daws.
