ZAJ NYEEM HNUB TIM 20 LUB 2 HLIS 2024
HNUB NCO TXOG LEEJ NTSHIAB DAS MIS AS NOS
COV LUS NYOB HAUV LUS KAS NTAWV MOO ZOO (LK 11: 29-32)
Kwv tij Hmoob sawv daws, hnub no Huab Tais Yes Xus hais txog thaum Tswv Ntuj xa Yos Nas mus ntuas cov neeg hauv lub tsheej Nis Nis Vas tias lawv yuav raug txim vim lawv tau ua txhaum loj. Yos Nas cov lus no ua rau cov neeg hauv Nis Nis Vas tig los yuav siab tshiab. Lawv tso tseg kev ua txhaum, ces Tswv Ntuj zam txim rau lawv.
Tab sis lub caij Huab Tais Yes Xus tshaj lub Moo Zoo rau cov Yus Das, mas lawv tsis ntseeg, lawv xav pom Huab Tais Yes Xus ua ib lub cim tias nws yog tus Tswv Ntuj xa tuaj tiag, mas lawv mam ntseeg, lawv mam tig los yuav siab tshiab.
Niaj hnub no tej zaus peb coob tus yuav hais zoo li cov Yus Das, peb yuav hais tias yog muaj Tswv Ntuj tiag, mas thov Tswv Ntuj pub kom kuv tau li lub siab ntshaw mas; Tswv Ntuj yees tawm los rau kuv pom kiag tso, kuv mam ntseeg.
Cov kwv tij, lub caij no tsis yog lub caij Tswv Ntuj yuav ua hwj huam rau sawv daws pom xws li txheej thaud Tswv Ntuj tau ua rau cov Yus Das pom lawm, lub caij no yog lub caij Tswv Ntuj yuav cov neeg muab tas lub siab los ntseeg, mloog Tswv Ntuj hais lawm xwb.
Tus twg hloov siab tshiab mas tus neeg ntawd yuav tsis raug txim nyob hauv nws lub caij kawg. Yog li mas kwv tij Hmoob, niaj hnub no Tswv Ntuj tsis pub peb pom nws lub hwj huam lawm tiag, tab sis tseem tshuav Tswv Ntuj Lo Lus, thiab Tswv Ntuj cov Cim Ntshiab nrog peb nyob. Li ntawd, thov kom peb hle lub qub siab no pov tseg, peb hnav dua lub siab tshiab, tig los mloog Tswv Ntuj Lo Lus, ua neej raws li Huab Tais Yes Xus tau qhia rau peb mog. Hnub txiav txim, peb thiaj yuav tsis raug txim.
Nyob zoo sawv daws.
