ZAJ NYEEM HNUB TIM 2 LUB 10 HLI 2024
HNUB NCO TXOG COV TSHIAB POV HWM
COV LUS NYOB HAUV MAS TAIS NTAWV MOO ZOO (MT 18: 1-5, 10)
Kwv tij Hmoob sawv daws, lub Koom Txoos qhia peb tias thaum Tswv Ntuj tsim peb los, Tswv Ntuj tau pub ib tug Tshiab los pov hwm peb txoj sia, tus Tshiab yuav npo peb hauv dab phem txhais tes mus li. Tus Tshiab pov hwm peb, nws yuav pab thov Tswv Ntuj rau peb.
Cov kwv tij, nyob hauv phau ntawv KEV TSIV, sau piav tias: Huab Tais Tswv Ntuj hais li no “Kuv yuav xa tus Tshiab mus ua nej ntej. Thaum nej taug kev, tus Tshiab yuav pov hwm nej, thiab tus Tshiab yuav coj nej mus txog lub teb chaws kuv npaj rau nej nyob. Nej yuav hwm kuv tus Tshiab, nej yuav mloog kuv tus Tshiab lo lus, nej txhob tawm tsam kuv tus Tshiab. Txhua yam tus Tshiab ua rau nej, yog kuv hais kom nws ua. Yog nej mloog kuv tus Tshiab thiab nej ua raws li kuv lo lus, kuv yuav yog tus tawm tsam nej tus yeeb ncuab. Kuv tus Tshiab yuav ua nej ntej thiab coj nej kev.”
Kwv tij Hmoob, Huab Tais Tswv Ntuj hais meej tseeb kawg txog tus Tshiab pov hwm peb. Tus Tshiab pov hwm yuav yog tus coj peb kev, nws yuav hais lus rau peb thaum peb xaiv saib yuav ua qhov zoo los qhov phem. Yog peb mloog tus Tshiab lus, mas peb yuav xaiv tau txoj kev zoo taug, peb yuav xaiv mloog Tswv Ntuj Lus.
Kwv tij, lub Moo Zoo hnub no Huab Tais Yes Xus kuj tau hais tias cov Tshiab pov hwm peb lawv nrog Tswv Ntuj nyob saum ntuj, lawv ntsia ntsoov peb thiab lawv ntsia ntsoov Tswv Ntuj. Yog li thaum peb ua ib yam dab tsi, Tswv Ntuj thiaj paub tas.
Kwv tij, Huab Tais Yes Xus kuj ntuas peb kom ua neeg me xws li cov me nyuam yaus, thiab kom peb txhob thuam lwm tus.
Hnub no peb yuav nco txog tus Tshiab pov hwm peb. Peb yuav thov peb tus Tshiab pab thov Tswv Ntuj rau peb. Peb yuav mloog Tswv Ntuj Lo Lus uas tus Tshiab coj tuaj hais rau peb xws li ib tug me nyuam zoo siab mloog nws leej txiv lus.
