ZAJ NYEEM HNUB TIM 19 LUB 9 HLI 2024
HNUB NCO TXOG LEEJ NTSHIAB NTSES NUS AS LIAS
COV LUS NYOB HAUV LUS KAS NTAWV MOO ZOO (LK 7: 36-50)
Kwv tij Hmoob sawv daws, hnub no nej hnov lub Moo Zoo hais tias thaum Huab Tais Yes Xus tab tom noj mov hauv ib tug Fas Lis Xais tsev, txawm muaj ib tug poj niam yog neeg txhaum txav los nram Huab Tais Yes Xus ko taw, ces nws muab nws co kua muag ywg Huab Tais Yes Xus txhais taw, nws muab nws cov plaub hau los so Huab Tais Yes Xus ko taw, nws nwj Huab Tais Yes Xus txhais taw tsis tseg. Tus Fas Lis Xais pom li ntawd, nws tsis yog hlub tus poj niam ntawd thiab qhuas qhov tus poj niam ua, nws tseem xav tias ua cas Huab Tais Yes Xus yuav cia tus poj niam muaj txhaum los ua li ntawd rau Yes Xus thiab.
Huab Tais Yes Xus xav qhia tus Fas Lis Xais ntawd thiab qhia cov neeg koom rooj mov, mas Huab Tais Yes Xus thiaj hais zaj paj lug tus tswv nyiaj zam cov nuj nqis rau tus neeg tuaj txais nyiaj.
Huab Tais Yes Xus hais tias raws li xav mas tus twg yuav nyiam tus tswv nyiaj dua; puas yog tus tau zam 500 lub txiaj, los yuav yog tus tau zam 50 lub txiaj?
Tus Fas Lis Xais hais tias raws li nws xav mas tus neeg uas tus tswv nyiaj zam 500 lub txiaj rau, nws yuav nyiam tus tswv nyiaj dua.
Huab Tais Yes Xus thiaj hais tias yog li tus Fas Lis Xais hais.
Ces Huab Tais Yes Xus thiaj hais txog tus poj niam muaj txhaum no tias nws nyiam Huab Tais Yes Xus dua tus Fas Lis Xais vim tias Huab Tais Tswv Ntuj zam rau nws ntau dua tus Fas Lis Xais.
Kwv tij Hmoob, peb ua neej nyob mas peb sawv daws puav leej yog neeg txhaum, peb cov txhaum ntau tas nrho. Peb tsis muaj peev xwm yuav daws tas peb cov txhaum, tab sis vim Huab Tais Tswv Ntuj hlub peb mas nws yeem muab nws Leej Tub los ua nqe txhiv peb, ces peb yuav tau txais kev zam ntawm Huab Tais Tswv Ntuj yog tias peb ntseeg txog Huab Tais Leej Tub.
Huab Tais Yes Xus nqes los ua neeg thiab qhia tej no rau peb paub, mas ziag no nyob ntawm peb saib peb yuav nyiam Huab Tais Tswv Ntuj npaum cas. Peb puas muab tas peb lub siab lub peev xwm los nyiam Huab Tais Tswv Ntuj xws li tus poj niam muaj txhaum no nyiam Huab Tais Yes Xus, los peb yuav nyiam xws li tus Fas Li Xais.
